အရပ်ဘက်အဖွဲ့အစည်းတို့၏ အကြံပြုချက်များ သင်းဖွဲ့ဥပဒေတွင် ပါဝင်ရန် ဆက်လက် အရေးဆိုမည်

ယုဝေ| ကြာသပတေးနေ့၊ ACM Re-Post 5-6-2014

မကြာမီထုတ်ပြန်ဖွယ်ရှိသည့် အသင်းအဖွဲ့များ မှတ်ပုံတင်ခြင်းဆိုင်ရာ ဥပဒေတွင် အရပ်ဘက်အဖွဲ့အစည်းများက ပါဝင်စေလိုသည်ဟု အကြံပြုထားသည့်အချက်များ မပါဝင်ပါက ဆက်လက်အရေးဆိုရန် စီစဉ်သွားမည်ဟု အဆိုပါအဖွဲ့တို့၏ မေ ၃၀ ရက်စွဲဖြင့် ဇွန် ၄ ရက် ထုတ်ပြန်သည့် ကြေညာချက်တွင် ပါဝင်သည်။

ပြီးခဲ့သည့် မေလကုန်က အရပ်ဘက်အဖွဲ့အစည်းလုပ်ငန်းအဖွဲ့များကို ကိုယ်စားပြု ကိုယ်စားလှယ် ၁၆ ဦးသည် အသင်းအဖွဲ့များမှတ်ပုံတင်ခြင်း ဥပဒေကြမ်းကို ပြည်ထောင်စုလွတ်တော်က အတည်မပြုမီ သက်ဆိုင်ရာ လွှတ်တော်ကော်မတီများနှင့်သွားရောက်ဆွေးနွေးခဲ့သေးသည်ဟု အရပ်ဘက်အဖွဲ့အစည်း တာဝန်ရှိသူတို့က ပြောသည်။ ထိုစဉ်က အရပ်ဘက်အဖွဲ့အစည်းတို့ ပါဝင်စေလိုသည့် အချက်ကိုးချက်ကို ရှင်းလင်း ဆွေးနွေးပြီး ဖြစ်သည် ဟုဆိုသည်။

“ကျွန်တော်တို့ သွားဆွေးနွေးတော့ သူတို့လိုက်လျောနိုင်တဲ့ အချက်တွေကိုလည်း ထည့်သွင်းစဉ်းစားပေမယ်။ မလိုက်လျောနိုင်တဲ့အချက်တွေကလည်း ဒီအချက်တွေဆိုတာကို ပြောခဲ့ပါတယ်” ဟု ကိုလှိုင်မြတ် (Local Resource Centre) က ပြောသည်။

အချက်ကိုးချက်အနက် မှတ်ပုံတင်ခြင်းကို ပထ၀ီအရကန့်သတ်ချက်များပယ်ဖျက် ပေးရန်နှင့် မှတ်ပုံတင် အဖွဲ့အစည်းများ ဖွဲ့စည်းရာတွင် နိုင်ငံရေးသြဇာလွမ်းမိုးမှုကင်းလွတ်ပြီး အရပ်ဘက်အဖွဲ့များ ဖွံ့ဖြိုးရေးကို ကူညီဆောင်ရွက်ပေးနိုင်သည့် သီးခြားလွတ်လပ်သော ပရော်ဖက်ရှင်နယ်များဖြင့် ဖွဲ့စည်းပေးရန် ဟူသော အချက် နှစ်ချက်ကို ထိုစဉ်ကတည်းက လွှတ်တော်ကော်မတီတို့ လက်မခံခဲ့ဟုပြောသည်။

ထို့ကြောင့် မကြာမီထုတ်ပြန်ဖွယ်ရှိသည့် ဥပဒေတွင် ယင်းတို့မပါဝင်ပါက သမ္မတရုံးမှ တစ်ဆင့် ဆက်လက် အရေးဆိုမည်ဟု အရပ်ဘက်အဖွဲ့အစည်းတို့က ပြောသည်။

Aye Chan Mon Credit To: Mizzima - News in Burmese
https://www.facebook.com/excellencemedia
http://www.ayechanmon-news1.com/