ဟံသာဝတီ ဦးဝင်းတင်၏ ဈာပနသို့ ပြည်သူတစ်သိန်းနီးပါး ဂါရ၀ပြုပို့ဆောင်

Published on: April 23, 2014

အမျိုးသားဒီမိုကရေစီအဖွဲ့ချုပ် သဘာပတိအဖွဲ့ဝင် သတင်းစာဆရာကြီး ဟံသာဝတီဦးဝင်းတင်၏ ဈာပနအခမ်းအနားကို ဧပြီ ၂၃ ရက် မွန်းတည့် ၁၂ နာရီမှ ညနေ ၅ နာရီအထိ ရေဝေးသုသာန်၌ ပြုလုပ်ခဲ့ရာ ထိုအခမ်းအနားသို့ လာရောက်ဂါရ၀ပြုသူ တစ်သိန်းနီးပါးရှိခဲ့ကြောင်း သိရသည်။

ဧပြီ ၂၁ ရက် နံနက်ပိုင်းက ကွယ်လွန်ခဲ့သည့် ဟံသာဝတီဦးဝင်းတင်အား နောက်ဆုံး ဂါရ၀ပြု နှုတ်ဆက်သည့်အနေဖြင့် ဟံသာဝတီဦးဝင်းတင်၏ နိုင်ငံရေးလုပ်ဖော်ကိုင်ဖက်များ၊ နိုင်ငံရေးပါတီအချို့မှ ဦးဆောင်သူများ၊ နိုင်ငံရေးတက်ကြွလှုပ်ရှားသူများ၊ နိုင်ငံရေးအဖွဲ့အစည်းများ၊ နိုင်ငံရေးအကျဉ်းသားဟောင်းအဖွဲ့အစည်းများ၊ လူထုအခြေပြု အဖွဲ့အစည်းများ၊ စာပေပညာရှင်များနှင့် သတင်းစာဆရာများ၊ အနုပညာရှင်များနှင့် ဟံသာဝတီဦးဝင်းတင်အား လေးစားမြတ်နိုးသည့် ပြည်သူများက လာရောက်ဂါရ၀ပြုခဲ့ကြခြင်း ဖြစ်သည်။

ထို့အပြင် အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်၊ အမျိုးသားဒီမိုကရေစီအဖွဲ့ချုပ်နာယက ဦးတင်ဦး၊ ဗဟိုအလုပ်အမှုဆောင်အဖွဲ့ဝင်များဖြစ်သည့် ဦးဥာဏ်ဝင်း၊ ဦးအုန်းကြိုင်၊ ဦးဝင်းထိန်၊ ဒေါ်စုစုလွင်၊ ဦးစိုးဝင်းအပါအ၀င် အမေရိကန်၊ နယူးဇီလန်နှင့် ဗြိတိန်သံရုံးအစရှိသည်တို့မှ သံအမတ်ကြီးများ၊ သံရုံးတာဝန်ရှိသူများလည်း လိုက်လံပို့ဆောင်ခဲ့ကြသည်။

ဦးဝင်းတင်၏ ဈာပနအခမ်းအနားသည် ၁၉၈၉ ခုနှစ် ဒေါ်ခင်ကြည် ဈာပနအခမ်းအနားအလွန် ၂၅ နှစ်တာ ကာလအတွင်း နိုင်ငံရေးနယ်ပယ်၌ အစည်ကားဆုံး ဈာပနအခမ်းအနားဖြစ်ခဲ့ပြီး တိုင်းနှင့်ပြည်နယ်အသီးသီးမှ အမျိုးသားဒီမိုကရေစီအဖွဲ့ချုပ် ပါတီဝင်များအပြင် ပြည်သူအများအပြားက ရေဝေးသုသာန်သို့ ကိုယ်တိုင်ကိုယ်ကျ လာရောက်ပြီး ဂါရ၀ပြုပို့ဆောင်ခဲ့ခြင်းဖြစ်သည်။

“ကျွန်တော်တို့ ဒီနေ့အခမ်းအနားကို မွန်းတည့် ၁၂ နာရီကစပြီး ရေဝေးသုသာန် ခန်းမဆောင် ၁ (က)မှာ ပြုလုပ်ခဲ့ပါတယ်။ညနေ ၅ နာရီအထိ လူအ၀င်အထွက်က မရပ်သေးဘူး။ ၄ နာရီ ၁၅ မိနစ်မှာ အစီအစဉ်အရ အများပြည်သူ လာရောက်ဂါရ၀ပြုတာကို ရပ်လိုက်ရတယ်။ ခန့်မှန်းလူဦးရေက တစ်သိန်းအထက် ရှိမယ်”ဟုအမျိုးသားဒီမိုကရေစီအဖွဲ့ချုပ် ပြန်ကြားရေးအဖွဲ့မှ ဦးကြည်တိုးက ပြောကြားသည်။

ဦးဝင်းတင်ဈာပနသို့ လာရောက်ဂါရ၀ပြု နှုတ်ဆက်သူအရေအတွက်ကို သိရှိနိုင်ရန် လာရောက်သူများက စတစ်ကာများကပ်ပြီး ရေတွက်ခဲ့သော်လည်း ပြုလုပ်ခဲ့သည့် စတစ်ကာ သုံးသောင်းခန့်မှာ နာရီပိုင်းအတွင်း ကုန်သွားခဲ့သည်။

ထို့ပြင် မွန်းတည့် ၁၂ နာရီမှ စတင်ပြီး ညနေ ၄ နာရီ ၁၅ မိနစ် အချိန်အထိ လာရောက်ဂါရ၀ပြုသည့် ပြည်သူများအား နှစ်ယောက်တွဲနှုန်းဖြင့် အလှည့်ကျတန်းစီ ၀င်ရောက်စေပြီး ၀င်ရောက်စေခဲ့ရာ ညနေ ၄ နာရီ ၁၅ မိနစ်အချိန်အထိ ဂါရ၀ပြုရန် တန်းစီစောင့်ဆိုင်းခဲ့သူများ ရှိခဲ့သည်။

ထို့ကြောင့် ခန်းမအတွင်းသို့ ၀င်ရောက်ဂါရ၀ပြုခွင့် မရခဲ့သူများနှင့်ပြင်ပ၌ စောင့်ဆိုင်းနေသူ သောင်းဂဏန်းခန့်က ရေဝေးသုသာန်မှ ဂူသွင်းမြှုပ်နှံမည်နေရာသို့ ခြေကျင်ခရီးဖြင့် ထပ်မံပို့ဆောင်ခဲ့ကြရာ ညနေ ၅ နာရီကျော်မှ ဂူသွင်းမြှုပ်နှံမည့်နေရာသို့ ရောက်ရှိခဲ့သည်။

ဒေါ်အောင်ဆန်းစုကြည်သည် ဦးဝင်းတင်အား ဂါရ၀ပြုရန် ထားရှိသည့်ခန်းမသို့ ညနေ ၃ နာရီ ၄၀ မိနစ်အချိန်တွင် ရောက်ရှိခဲ့ပြီး ဦးဝင်းတင်အား ကန်တော့ခြင်းဖြင့် ဂါရ၀ပြုခဲ့သည်။ ထို့နောက် ဒေါ်အောင်ဆန်းစုကြည်သည် ခန်းမအတွင်း ခေတ္တနေထိုင်ခဲ့ပြီး ညနေ ၄ နာရီခန့်အချိန်၌ ခန်းမမှ ပြန်လည်ထွက်ခွာသွားကာ ဦးဝင်းတင်အား ဂူသွင်းမြှုပ်နှံမည့်နေရာ၌ မတ်တတ်ရပ်လျက် ကြိုတင်စောင့်ဆိုင်းနေခဲ့သည်။ ညနေ ၅ နာရီအချိန်တွင် ဂူသွင်းမြှုပ်နှံမည့် နေရာသို့ ဦးဝင်းတင်၏ ရုပ်အလောင်း ရောက်ရှိခဲ့ပြီး ဦးဝင်းတင်အား ဂူသွင်းပြီးနောက် ရေဝေးသုသာန်မှ ဒေါ်အောင်ဆန်းစုကြည် ပြန်လည်ထွက်ခွာသွားသည်။

ဦးဝင်းတင်အား နောက်ဆုံးဂါရ၀ပြု နှုတ်ဆက်ရန်အတွက် ရေဝေးသုသာန်သို့ လာရောက်ရာတွင် ယုဒသန်ခန်းမမှ လာရောက်သူများ၊ ဦးဝင်းတင်၏ နေအိမ်မှ လာရောက်သူများ၊ အမျိုးသားဒီမိုကရေစီအဖွဲ့ချုပ်ရုံးမှ လာရောက်သူများ အသီးသီးရှိခဲ့ပြီး မြောက်ဥက္ကလာအ၀ိုင်းတွင် စုရပ်ပြုလုပ်ကာ ထိုနေရာမှ ရေဝေးသုသာန်သို့ ခြေကျင်လျှောက် လာရောက်ဂါရ၀ပြုခဲ့သူများအပြင် မိမိအစီအစဉ်ဖြင့် လာရောက်ခဲ့သူများလည်း ရှိခဲ့သည်။
လာရောက်သူ များပြားသည့်အတွက် ယာဉ်ကြောပိတ်ဆို့မှုများဖြစ်ခဲ့ပြီး ခြေကျင်လျှောက်ကာ လာရောက်ခဲ့သူအရေအတွက်မှာလည်း ထောင်ဂဏန်း ရှိခဲ့သည်။

ဦးဝင်းတင်အား နောက်ဆုံးနှုတ်ဆက် ဂုဏ်ပြုခြင်းအနေဖြင့် ယုဒသာန်ခန်းမအနီးရှိ ဓာတ်တိုင်များ၊ လှည်းတန်းခုံးကျော်တံတားတိုင်များတွင် ဦးဝင်းတင်ပုံတူအား ဂရပ်ဖစ်တီ ပြုလုပ်ခဲ့သူများလည်း ရှိသည်။ ထို့အပြင် ဈာပနသို့ အပြာရောင်အင်္ကျီ ၀တ်ဆင်ပြီး လာရောက်ခဲ့ကြသူများရှိသည့်နည်းတူ “ကမ္ဘာမကြေဘူး”သီချင်းအား ဈာပနအခမ်းအနားပြုလုပ်စဉ် တစ်လျှောက်လုံး သီကြွေးဟစ်ဆိုပြီး ဂုဏ်ပြုနှုတ်ဆက်ခဲ့သူ အများအပြားလည်း ရှိခဲ့ပါသည်။

(ကမ္ဘာမကြေဘူး သီချင်းဖြင့် ဂုဏ်ပြုသီဆိုနေသော လူငယ်များ)

ဦးဝင်းတင်၏ ဈာပနအခမ်းအနားသို့ အဖွဲ့အစည်းပေါင်း ၄၆ ဖွဲ့မှ သ၀ဏ်လွှာများပေးပို့ခဲ့သည့်နည်းတူ နယ်ပယ်အသီးသီးမှ ပန်းခွေ၊ ပန်းခြင်းပေါင်း ၁၀၀၀ ကျော်ပေးပို့ခဲ့ကြောင်း သိရသည်။

“ဦးဝင်းတင်ဟာ မျက်နှာတစ်ဖက်တည်းရှိလို့ အရမ်းလေးစားပါတယ်။ သူ့ဘ၀တစ်လျှောက်လုံး ပြည်သူဘက်ကိုပဲ မျက်နှာမူခဲ့တာပါ။ ကျွန်တော်ဆိုရင် ကျန်းမာရေးမကောင်းတဲ့ကြားက လိုက်ပို့ခဲ့တာ။ ဦးဝင်းတင်ဟာ ကျွန်တော်တို့ရင်ထဲမှာ ဘယ်တော့မှ မသေပါဘူး”ဟု ပုဇွန်တောင်မြို့နယ်မှ လာရောက်ပို့ဆောင်ခဲ့သူ ဦးကြည်ဝင်းက ပြောပါသည်။

“ဦးဝင်းတင်ဟာ မူတစ်ခုတည်းအပေါ်မှာ ရပ်တည်ခဲ့တဲ့သူ ဖြစ်တယ်။ သူ့ကို ဘယ်လိုပဲ တွန်းလှဲခဲ့ကြပါစေ ဘယ်တော့မှ ပြိုလဲမသွားခဲ့ဘူး။ သေသည်အထိ သူ့ကို ဘယ်သူကမှ ပြိုလဲအောင် မတွန်းလှဲနိုင်ခဲ့ဘူး။ ကျွန်တော်တို့ ရင်ထဲက သူရဲကောင်းဖြစ်တဲ့အတွက် လိုက်ပို့ခဲ့တာပါ”ဟု မန္တလေးမြို့မှ လာရောက်ပို့ဆောင်ခဲ့သည့် ကိုမြတ်ထင်က ပြောကြားခဲ့ပါသည်။
-

(သတင်းစာဆရာကြီးဦးဝင်းတင်၏ ဈာပနသို့ ဒေါ်အောင်ဆန်းစုကြည် လာရောက်စဉ်)

Aye Chan Mon# Credit To : Eleven Media Group > ပြန်လည် မျဝေခြင်း ဖြစ်ပါသည် (5 photos)