လာဘ်ပေးလာဘ်ယူမှု ပပျောက်ရေးကော်မရှင် အနေဖြင့် လုပ်ငန်းများ ပိုမိုလုပ်ဆောင်ရန်နှင့် အဂတိလိုက်စားမှုတိုက်ဖျက်ရေး ဥပဒေအပါအ၀င် ဥပဒေအများအပြား အသက်ဝင်ရန် လိုအပ်ဟု မြန်မာနိုင်ငံဆိုင်ရာ ဗြိတိန်သံအမတ်ကြီးဟောင်း ပြောကြား

Published on: May 4, 2014
Written by: ဖြိုးဝေ

လာဘ်ပေးလာဘ်ယူမှု ပပျောက်ရေးကော်မရှင် အနေဖြင့် ယခုထက်လုပ်ငန်းများ ပိုမိုလုပ်ဆောင်ရန်နှင့် အဂတိလိုက်စားမှု တိုက်ဖျက်ရေးဥပဒေ အပါအ၀င် ဥပဒေအများအပြားမှာ အသက်ဝင်ရန် လိုအပ်နေကြောင်း မြန်မာနိုင်ငံဆိုင်ရာ ဗြိတိန်သံအမတ်ကြီးဟောင်းနှင့် မြန်မာ့စီးပွားရေးကဏ္ဍ တာဝန်ယူမှုရှိရေး အထောက်အကူပြုဌာန (MCRB) မှ ဒါရိုက်တာ ဗစ်ကီဘိုးမင်းက ပြောကြားသည်။

မြန်မာနိုင်ငံဆိုင်ရာ ဗြိတိန်သံအမတ်ကြီးဟောင်း ဗစ်ကီဘိုးမင်းသည် မြန်မာနိုင်ငံရှိ မြန်မာ့စီးပွားရေး လုပ်ငန်းများအား အဂတိလိုက်စားမှု တိုက်ဖျက်ရေး၊ အဖွဲ့အစည်းဆိုင်ရာ ပွင့်လင်းမြင်သာမှု၊ လူ့အခွင့်အရေး လုံခြုံစိတ်ချမှုနှင့် သဘာဝ ပတ်ဝန်းကျင်ရေးရာ နယ်ပယ်များတွင် ပွင့်လင်းမြင်သာမှု တိုးတက်စေရန် ရည်ရွယ်၍ ပွင့်သစ်စစီမံချက်အား မတ်လမှစတင် လုပ်ဆောင်နေကြောင်း သိရသည်။

ပွင့်သစ်စစီမံချက်အတွက် မြန်မာ့စီးပွားရေးကဏ္ဍ တာဝန်ယူမှုရှိရေး အထောက်အကူပြုဌာန (MCRB) အနေဖြင့် မြန်မာ့စီးပွားရေးလုပ်ငန်းတွင် ထင်ရှားသော ပြည်တွင်းကုမ္ပဏီ ၆၀ အနက်မှ အေးရှားဝေါလ်၊ ACE၊ ဧဒင်၊ ထူးကုမ္ပဏီအုပ်စု၊ ကမ္ဘောဇကုမ္ပဏီအုပ်စု၊ ဒိုင်းမွန်းစတားကုမ္ပဏီ၊ နိုင်ကုမ္ပဏီအုပ်စုနှင့် Capital Power Company စသည့်ကုမ္ပဏီကြီးများ အပါအ၀င် ကုမ္ပဏီများ၏ တရားဝင် ၀က်ဘ်ဆိုက်များကို လေ့လာမှုများ ပြုလုပ်ခဲ့ပြီး ကုမ္ပဏီ ၃၄ ခုတွင်သာ တရားဝင်ဝက်ဘ် ဆိုက်လွှင့်တင်ထားကြောင်း ပြောကြားသည်။ အဆိုပါကုမ္ပဏီ ၀က်ဘ်ဆိုက်များထဲမှ အရေအတွက် အနည်းငယ်သာလျှင် ၎င်းတို့၏ အဂတိလိုက်စားမှု တိုက်ဖျက်ရေး လုပ်ဆောင်ချက်များနှင့် ယင်းတို့၏ ဖွဲ့စည်းတည်ဆောက်ပုံများကို ဖော်ပြထားကြောင်း ၎င်းကပြောကြားသည်။

“အစိုးရအနေနဲ့ ပြုပြင်ပြောင်းလဲရေးကို အရှိန်အဟုန်နဲ့ လုပ်နေပါတယ်။ အကျင့်ပျက်ခြစားမှုကို ပိုပြီးတော့ အားနည်းအောင် လုပ်ရပါမယ်။ လုပ်ငန်းတော်တော်များများကို အွန်လိုင်းကနေ လုပ်နိုင်ဖို့ လိုအပ်ပါတယ်။ အွန်လိုင်းကနေ လုပ်နိုင်ရင် အကျင့်ပျက်ခြစားမှုဆိုင်ရာ ပြဿနာ တော်တော်နည်းသွားပါမယ်။ အကျင့်ပျက်ခြစားမှုဆိုတာ လူအချင်းချင်း မျက်နှာချင်းဆိုင်ညှိနှိုင်းမှ ဖြစ်လာတာမို့လို့ပါ” ဟု ဧပြီ ၂၉ ရက်တွင် ဗစ်ကီဘိုးမင်းက ပြောကြားသည်။

မြန်မာနိုင်ငံတွင် လူမှုပြဿနာ များနှင့်ဆိုင်သည့် အလုပ်သမားဥပဒေ၊ သဘာဝပတ်ဝန်းကျင် ထိန်းသိမ်းရေး ဥပဒေများတွင် နည်းဥပဒေများ ရေးဆွဲနိုင်ရန်နှင့် ယင်းဥပဒေများတွင် လိုအပ်ချက် အများအပြား ရှိနေကြောင်း၊ သတင်းလွတ်လပ်ခွင့်ဆိုင်ရာ အခွင့်အရေးများ အပြည့်အ၀ ရရှိရန် လိုအပ်နေကြောင်းနှင့် ဥပဒေများ အသက်ဝင်ထိရောက်မှုရှိရန် လိုအပ်နေကြောင်း ဗစ်ကီဘိုးမင်းက ပြောကြားသည်။

အကျင့်ပျက်လာဘ်စားမှု များပြားသည့် မြန်မာနိုင်ငံတွင် အဂတိလိုက်စားမှုများကို တားမြစ်နိုင်ရန် ဒုတိယသမ္မတ ဒေါက်တာစိုင်းမောက်ခမ်းဦးဆောင်သည့် လာဘ်ပေးလာဘ်ယူမှု အရေးယူဆောင်ရွက်ရေး ကော်မတီ၏ လုပ်ငန်းများ သိရှိရန် ပြည်သူ့လွှတ်တော်ကိုယ်စားလှယ် ဦးသိန်းညွန့်က န၀မအကြိမ်ကျင်းပသည့် ပြည်သူ့လွှတ်တော် အစည်းအဝေးတွင် မေးမြန်းခဲ့သော်လည်း ပြန်လည်ဖြေကြားခြင်းမရှိဘဲ ပြည်ထဲရေးဝန်ကြီးဌာန၊ ပြည်ထောင်စုဝန်ကြီးမှတစ်ဆင့် စာဖြင့်ပြန်လည် ဖြေဆိုရာတွင် တိုင်ကြားသည့် အမှုပေါင်း ၃၈၂ မှုရှိပြီး ပေါ်လွင်ထင်ရှားမှုမရှိသော အမှု ၁၈၃ မှု၊ ပေါ်လွင်ထင်ရှားမှုရှိသော အမှု ၉၁ မှု၊ စိစစ်ဆဲ ၄၄ မှုရှိကြောင်း သိရသည်။ ထိုသို့ တိုင်ကြားမှု များပြားသော်လည်း တရားစီရင်ရေးနှင့် သက်ဆိုင်သည့် တိုင်ကြားမှု သုံးမှုသာရှိကြောင်း ဖော်ပြထားသည့်အတွက် အံ့သြမိကြောင်း မေးမြန်းသူ ဦးသိန်းညွန့်က ပြောကြားထားသည်။

ထို့ပြင် ဦးမြ၀င်း (စစ်မှုထမ်း) ဦးဆောင်သည့် လာဘ်ပေးလာဘ်ယူမှုပပျောက်ရေး ကော်မရှင်အား အဖွဲ့ဝင် ၁၅ ဦးဖြင့် ဖွဲ့စည်းခဲ့ပြီး မတ် ၃ ရက်တွင် ပြည်ထောင်စုလွှတ်တော်၌ ကတိသစ္စာ ပြုခဲ့ကြောင်း သိရသည်။ မြန်မာနိုင်ငံတွင် လာဘ်ပေးလာဘ်ယူမှုနှင့် ပတ်သက်၍ လူအများ သိရှိနေသည်မှာ အစိုးရထိပ်ပိုင်း ပုဂ္ဂိုလ်များသာ အများဆုံးဖြစ်သဖြင့် တိုင်ကြားမှုများနှင့် ပတ်သက်၍ အရေးယူရန် ခဲယဉ်းကြောင်းနှင့် ထိုသို့ခဲယဉ်းသည့်အတွက် အဆိုပါကော်မရှင်အပေါ် ပြည်သူလူထုမှ ယုံကြည်မှု နည်းပါးနေကြောင်း သိရသည်။

မြန်မာနိုင်ငံဆိုင်ရာ ဗြိတိန်သံအမတ်ကြီးဟောင်း ဗစ်ကီဘိုးမင်းအား (MCRB) ၏ ပွင့်သစ်စ စီမံချက်အကြောင်း သတင်းစာရှင်းလင်းပွဲတွင် တွေ့ရစဉ် (၀ဲအစွန်)

Aye Chan Mon# Credit To :Eleven Media Group
မိတ်ဆွေဒီလင့် https://www.facebook.com/excellencemediaကလစ်လေးတချက်နှိပ်လိုက်ရုံဖြင့် သတင်းအစုံကို ဖတ်ရမှာပါ မမေ့နဲ့နော်

3