လှိုင်သာယာ-ဟင်္သာတ ရထားလမ်းအတွက် လျော်ကြေးပေးရမည့် ငွေကျပ် သိန်းပေါင်း ၃၅၀၀၀ ကျော်ထိရှိပြီး ၂၀၁၅-၂၀၁၆ ဘဏ္ဍာနှစ်မှ အကျေပေးလျော်ရန်စီစဉ်

ACM Re-Post 26-5-2014
Written by: အောင်ရဲကို၊ ရှိုင်းလင်းအောင်

လှိုင်သာယာ-ဟင်္သာတ ရထားလမ်း အတွက် လျော်ကြေးပေးရမည့် ငွေကျပ်သိန်းပေါင်း ၃၅၀၀၀ ကျော်ထိရှိပြီး ၂၀၁၅-၂၀၁၆ ဘဏ္ဍာနှစ်မှ အကျေပေးလျော်ရန် စီစဉ်ထားကြောင်း ရထားပို့ဆောင်ရေး ၀န်ကြီးဌာနမှ သိရသည်။

၂၀၁၁ ခုနှစ်အတွင်းမှ စတင်ကာ ရထားလမ်းဖောက်လုပ်မှု စတင်ခဲ့သော လှိုင်သာယာ-ဟင်္သာတ ရထားလမ်းပိုင်းအတွက် မလွတ်ကင်းသော အိမ်ခြံမြေယာလယ်များကို အသုံးပြုခဲ့ရပြီး လျော်ကြေးများပေးရန် ရထားပို့ဆောင်ရေး ၀န်ကြီးဌာနမှ နစ်နာသူများနှင့် ညှိနှိုင်းမှုပြုလုပ်ခဲ့ကြောင်း သိရသည်။

ရထားပို့ဆောင်ရေး ၀န်ကြီးဌာန ပြည်ထောင်စုဝန်ကြီး ဦးသန်းဌေးက “ကျွန်တော်တို့ ပေးလျော်ရမယ့်ငွေက ကျပ်သိန်းပေါင်း ၃၀၀၀၀ ကျော်ရှိတယ်။ အဲဒီမှာ ကျပ်သိန်း ၁၀၀၀ ကျော်ကိုတော့ ပေးလျော်ပြီးသွားပါပြီ” ဟု ပြောကြားသည်။

သို့သော် ကျန်ရှိသော ကျပ်သိန်းပေါင်း ၃၄၀၀၀ ကျော်ကိုမူ ၂၀၁၅-၂၀၁၆ ဘဏ္ဍာနှစ်အတွင်း ပေးလျော်ရန် ရထားပို့ဆောင်ရေး ၀န်ကြီးဌာနက စီစဉ်ထားဆဲဖြစ်ကြောင်း လျော်ကြေးပေးရန် စိစစ်ဆဲစာရင်းအတွင်း ဖော်ပြထားသည်။

ယင်းလမ်းပိုင်းတစ်လျှောက် လျော်ကြေးပေးရမည့် မြို့နယ်များအရ ဟင်္သာတ၊ ဇလွန်၊ ဓနုဖြူ၊ ညောင်တုန်းမြို့နယ်များဖြစ်ပြီး ညောင်တုန်းဒေသမှာ ကျပ်သိန်းပေါင်း နှစ်သောင်းကျော်ဖြင့် အများဆုံးရှိနေကြောင်း သိရသည်။

အဆိုပါဒေသများမှာ အဓိကအားဖြင့် ဥယျာဉ်မြေ၊ လယ်၊ ငါးကန်၊ သီးနှံတို့ကို ဖျက်ပေးခဲ့ရပြီးရကြောင်း၊ လျော်ကြေးငွေ ပေးလျော်ရမည့်အပိုင်းကို သက်ဆိုင်ရာ တိုင်းဒေသကြီး အစိုးရအဖွဲ့မှ တစ်ဆင့်ခံ လုပ်ဆောင်နေကြောင်း သိရသည်။

ယခင် လှိုင်သာယာ-ဟင်္သာတ လမ်းပိုင်းကို ယခင်အစိုးရ လက်ထက်က စတင်ဖောက်လုပ်ရန် စီစဉ်ခဲ့ခြင်းဖြစ်ပြီး အကြောင်းအမျိုးမျိုးကြောင့် ဖြစ်ပေါ်မလာခဲ့ကြောင်း၊ အစိုးရသစ် တက်ခဲ့သည့်နှစ်မှ စတင်အကောင်အထည် ဖော်ခဲ့ခြင်းဖြစ်ကြောင်း ၂၀၁၄ ခုနှစ် မေ ၂၄ ရက်တွင် ဖွင့်လှစ်ခဲ့ကြောင်း ရထားပို့ဆောင်ရေး ၀န်ကြီးဌာနက ထုတ်ပြန်ခဲ့သည်။

လှိုင်သာယာ-ဟင်္သာတလမ်းပိုင်း ဖောက်လုပ်မှုအတွက် ကျပ်ဘီလျံ ၃၀ ခန့် ကုန်ကျခဲ့ကာ အကျိုးကျေးဇူးများစွာ ဖြစ်ထွန်းမည့် လမ်းပိုင်းဖြစ်သည်ဟု ရထားပို့ဆောင်ရေး ၀န်ကြီးဌာနက ထုတ်ပြန်ထားသည်။

လှိုင်သာယာ-ဟင်္သာတ ရထားလမ်းပိုင်းအား မေလအတွင်းက တွေ့ရစဉ်

Aye Chan Mon Credit To:Eleven Media Group
မိတ်ဆွေ-ဒီလင့် ၂ ခုကို Click နှိပ်ရုံဖြင့်သတင်းအစုံကိုဖတ်နိုင်ပါသည်။
https://www.facebook.com/excellencemedia
http://www.ayechanmon-news1.com/