အမှန်အတိုင်းဖြစ်ဖို့ အမှန်တရားကိုပဲ လက်ကိုင်ထားပြီးတိုက် Aye Chan Mon Aye Chan Mon

(ဆောင်းပါးရှင် - နီမင်းဆွေ)

အာဏာရှစ်စနစ်ကို ဖြုတ်ချနိုင်ဖို့ တော်လှန်ရေးလုပ်ရတယ်။ တော်လှန်ရေးကြီး အောင်မြင်သွားလို့ အစိုးရသစ် ပေါ်ပေါက်လာတော့လည်း နောက်ထပ် အာဏာရှင်စနစ်အသစ်တစ်ခု ပေါ်ပေါက်လာပြီး နောက်တက်တဲ့ မောင်ပုလဲ ဒိုင်းဝန်ထက်ကဲတဲ့အဖြစ်မျိုးနဲ့ ကြုံတွေ့ရတဲ့ ကော်တီဂွိုင်ဆိုတဲ့ စိတ်ကူးယဉ်နိုင်ငံလေးတစ်နိုင်ငံကို ဖန်တီးပြီး ကမ္ဘာကျော် စာရေးဆရာကြီး ဟာရိုးရော်ဘင် (Harold Robbins) က ၀တ္ထုတစ်ပုဒ် ရေးခဲ့ဖူးပါတယ်။ အဲဒီဝတ္ထုဟာ ၁၉၇၀ ပြည့်နှစ်မှာ (Adventurers) ဆိုတဲ့ မူရင်းဝတ္ထုရဲ့ နာမည်နဲ့ပဲ ရုပ်ရှင်ဇာတ်ကားတစ်ကားအဖြစ် ပေါ်ထွက်လာခဲ့ပါတယ်။

ဒီဇာတ်ကားရဲ့ဇာတ်လမ်းကို ၁၉၄၅ ခု နှစ်က တောင်အမေရိကတိုက်မှာရှိတဲ့ ကော်တီဂွိုင်ဆိုတဲ့နိုင်ငံလေးရဲ့ တောင်ကုန်းထူထပ်တဲ့ တောရွာလေးမှာရှိတဲ့ အိမ်ကြီးတစ်အိမ်ကို အစိုးရတပ်တွေက ၀င်ရောက်စီးနင်း တိုက်ခိုက်တဲ့အခန်းနဲ့ စပြီးဖွင့်တာပါ။ အဲဒီအိမ်ကြီးမှာရှိတဲ့ “ဒက်ဇ်” ဆိုတဲ့ ၁၀ နှစ်သားအရွယ် ကလေးတစ်ယောက်ရဲ့အစ်မတွေအားလုံးနဲ့ မိခင်ဟာ ဗိုလ်မှူးကြီးဂူတီယာရက်စ်ရဲ့ အစိုးရတပ်သားတွေက မုဒိမ်းကျင့်ပြီး သတ်ဖြတ်တာကို ခံလိုက်ကြရပါတယ်။
ဒက်ဇ် တစ်ယောက်သာ ထွက်ပြေးလွတ်မြောက်သွားပြီး သူပုန်တပ်ဖွဲ့တွေနဲ့ သွားဆုံပါတယ်။ သူပုန်တပ်ဖွဲ့ဆိုပေမယ့် သူတို့ကိုယ် သူတို့တော့ လွတ်မြောက်နယ်မြေရဲ့ ကော်တီဂွိုင်အစိုးရလို့ ခေါ်ကြတဲ့သူတွေပါပဲ။ တပ်ဖွဲ့ခေါင်းဆောင်ဟာ ဗိုလ်ချုပ်ကြီးရိုဂျိုဖြစ်ပြီး သူနဲ့အတူပါလာတဲ့ ငြိမ်းချမ်းရေးလိုလားသူ မစ္စတာဇီးနော့စ်ကတော့ ဒက်ဇ်ရဲ့ဖခင်ဖြစ်ပါတယ်။ အဲဒီတပ်ဖွဲ့ ဒက်ဇ်တို့အိမ်ကို ပြန်ရောက်လာတဲ့အချိန်မှာတော့ ဗိုလ်မှူးကြီး ဂူတီယာရက်စ်ရဲ့ အစိုးရတပ်တွေ ပြန်လည်ဆုတ်ခွာသွားကြပါပြီ။ ဒါပေမဲ့ အရက်အမူးလွန်ပြီး အိမ်ထဲမှာကျန်နေခဲ့တဲ့ အစိုးရတပ်သား ခုနစ်ယောက်ကို ဗိုလ်ချုပ်ကြီး ရိုဂျိုတို့အဖွဲ့က ဖမ်းမိသွားပြီး ချက်ချင်းသေဒဏ် စီရင်လိုက်ကြပါတယ်။

နောက်မကြာခင် ဗိုလ်မှူးကြီးဂူတီယာရက်စ်ရဲ့ အစိုးရတပ်သားတွေ အဲဒီအိမ်ကြီးဆီ ပြန်လာနေပြီဆိုတာ သတင်းရလို့ မစ္စတာဇီးနော့စ်တို့ သူပုန်တပ်ဖွဲ့တွေ လူစုခွဲရပြန်ပါတယ်။ တပ်ဖွဲ့ဝင်တွေက တစ်နေရာကို ရှောင်တိမ်းသွားရပြီး ဒက်ဇ်ကိုတော့ မစ္စတာဇီးနော့စ်ရဲ့ လူယုံ “Fat Cat” “ဖက်ကက်” (Ernest Borgnine) ဆိုသူက တောင်ခြေရွာလေးတစ်ရွာက ဗိုလ်ချုပ်ကြီးရိုဂျိုရဲ့ လယ်တောအိမ်ကို ပို့ပေးရပါတယ်။ နောက် အဲဒီရွာလေးကို ဗိုလ်မှူးကြီး ဂူတီယာရက်စ်ရဲ့အစိုးရတပ်ဖွဲ့တွေ ရောက်လာကြပြန်ပြီး တစ်ရွာလုံးကို မီးလောင်တိုက် သွင်းလိုက်ကြပြန်ပါတယ်။ အဲဒီမှာလည်း ဒက်ဇ်နဲ့ဖက်ကက်တို့ လွတ်မြောက်သွားကြပြီး သူတို့ရဲ့သူပုန်တပ်ဖွဲ့တွေ ထိန်းချုပ်ထားတဲ့ ကူရာတူမြို့လေးကို ရောက်သွားကြပါတယ်။ အဲဒီမှာ သူပုန်ခေါင်းဆောင်တွေဖြစ်ကြတဲ့ ဗိုလ်ချုပ်ကြီးရိုဂျိုရယ်၊ မစ္စတာဇီးနော့စ်ရယ် နောက်သူပုန်ဗိုလ်တစ်ယောက်ဖြစ်တဲ့ အယ်လ်ကွန်ဒိုရယ်တို့ အောင်ပွဲခံနေကြပါတယ်။ မစ္စတာဇီးနော့စ်လည်း ဖက်ကက် ခေါ်လာတဲ့ သားဖြစ်သူ ဒက်ဇ်နဲ့ပြန်ဆုံသွားကြပါတယ်။

နောက်မကြာမီမှာ ဗိုလ်ချုပ်ကြီး ရိုဂျို ဟာ လက်ရှိအစိုးရရဲ့တပ်ဖွဲ့တွေကို အောင်နိုင်သွားပြီး ကော်တီဂွိုင်ရဲ့ ၀န်ကြီးချုပ်ဖြစ်သွားပါတယ်။ မစ္စတာဇီးနော့စ်ကိုတော့ အီတလီနိုင်ငံဆိုင်ရာ ကော်တီဂွိုင် သံအမတ်ကြီးအဖြစ် ခန့်အပ်လိုက်ပြီး ဒက်ဇ်ဟာ သူ့အဖေနဲ့အတူ အီတလီနိုင်ငံ ရောမမြို့ကို ပါသွားပါတယ်။ ဒက်ဇ်အရွယ်ရောက်တဲ့အချိန်မှာ သံအမတ်ကြီး ကော်တီဂွိုင်ကို အလည်တစ်ခေါက်ပြန်ပါတယ်။ ရောမမှာနေရင်း ကော်တီဂွိုင်အတွက် နိုင်ငံတကာကရသမျှ အထောက်အပံ့တွေ အားလုံကို ဗိုလ်ချုပ်ကြီး ရိုဂျိုဆီရောက်အောင် ဇီးနော့စ်က ပို့ပေးနိုင်ခဲ့ပါတယ်။ သံအမတ်ကြီး ကော်တီဂွိုင်ကိုရောက်တော့ ၀န်ကြီးချုပ်ဗိုလ်ချုပ်ကြီး ရိုဂျိုကလေဆိပ်အထိလာကြိုပါတယ်။ နောက်ပြီး ရောမမှာတောင် ဒီလောက်ကြီးတဲ့ အဆောက်အအုံမရှိဘူးလို့ သံအမတ်ကြီး ခံစားသွားရလောက်အောင် ကြီးမားတဲ့ သူ့ရဲ့နန်းတော်ကြီးထဲကို ခေါ်သွားပါတယ်။ ၀န်ကြီးချုပ်က သူ့နန်းတော်ကြီးအကြောင်းကြွားလို့ မဆုံးနိုင်သေးခင်မှာ သံအမတ်ကြီးက သက်ပြင်းတစ်ချက်သာ ချခဲ့ရပါတယ်။ ကော်တီဂွိုင်လို နိုင်ငံအသေးအဖွဲလေးမှာ လူငါးယောက်လောက်နေဖို့ တစ်ဧကလောက်ကျယ်တဲ့ အဆောက်အအုံကြီးတွေ ဆောက်ပြလိုက်ရင် နိုင်ငံတကာက သူတို့ကို အထင်ကြီးသွားကြမှာပဲလို့ ထင်နေရလောက်အောင် ဥာဏ်ရည်နိမ့်တဲ့လူတွေ နိုင်ငံကို ဦးဆောင်နေသမျှ ဒီနိုင်ငံရဲ့အနာဂတ်ဟာ ရင်လေးစရာဖြစ်နေမှာပဲဆိုတာကို ဗိုလ်ချုပ်ကြီးရိုဂျို မသိရှာပါလား။ ငါရှာပို့တဲ့ပိုက်ဆံတွေလည်း စာသင်ကျောင်းတွေ၊ ဆေးရုံတွေဖြစ်မလာဘဲ ပြည်သူတွေအတွက် ဘယ်လိုမှ အသုံးမတည့်တဲ့ ဒီ ဧရာမအဆောက်အအုံကြီးတွေဆောက်တဲ့အထဲ ပါကုန်တာများလားလို့လည်း သံအမတ်ကြီး တွေးနေမိပါတယ်။

နောက်တော့ သံအမတ်ကြီးက သူ့ရဲ့မွေးရပ်ဇာတိရွာလေးက ဇနီးသည်ရဲ့ အုတ်ဂူကို သွားကြည့်ချင်လို့ ၀န်ကြီးချုပ်ကို ခွင့်တောင်းပါတယ်။ ၀န်ကြီးချုပ်က ခင်ဗျားသွားတာကတော့သွား။ ဒါပေမဲ့ အဲဒီမှာ အယ်လ်ကွန်ဒို ရှိတယ်။ သတိထားလို့ပြောပါတယ်။ သံအမတ်ကြီးက “ဟာ အယ်လ်ကွန်ဒိုက တော်လှန်ရေးတုန်းက ကျွန်တော်တို့ ရဲဘော်ရဲဘက်တွေပဲ။ ဘာသတိထားနေစရာလိုသေးလို့လဲ”လို့ မေးလိုက်ပါတယ်။ ၀န်ကြီးချုပ်က အဲဒီတုန်းကတော့ ဟုတ်တယ်။ ဒါပေမဲ့ အခု သူကကျုပ်ကို အာခံနေပြီလို့ပြန်ပြောပါတယ်။ မွေးရပ်ဇာတိရွာလေးမှာ သံအမတ်ကြီးနဲ့ တွေ့တော့ ၀န်ကြီးချုပ်ပြောသလို အယ်လ်ကွန်ဒိုဟာ သူပုန်ခေါင်းဆောင်ဖြစ်နေတယ်ဆိုတာကို တွေ့ရပါတယ်။ ငယ်ပေါင်းတွေမို့ သူတို့နှစ်ဦး တရင်းတနှီးစကားဆိုဖြစ်ကြပါတယ်။ အယ်လ်ကွန်ဒိုက“ဗိုလ်ချုပ်ကြီးရိုဂျိုဟာ တစ်ချိန်ကတော့ တကယ့်ကို လေးစားစရာကောင်းတဲ့ တော်လှန်ရေးရဲဘော်ရဲဘက် တစ်ယောက်ပဲ။ အခုတော့ သူဟာ သူ့အရင်က အာဏာရှင်တွေထက် ၁၀ ဆလောက် ဆိုးနေပြီ” လို့ ပြောပြပါတယ်။

အဲဒီအချိန်မှာ နိုင်ငံရဲ့မြို့တော်ထဲမှာ ၀န်ကြီးချုပ်နဲ့ လုံခြုံရေးအရာရှိချုပ်တို့ စကားပြောနေကြပါတယ်။ လုံခြုံရေးအရာရှိချုပ် ဆိုတာ တခြားလူမဟုတ်ပါဘူး။ ဇာတ်လမ်းအစမှာ ဒက်ဇ်တို့အိမ်ကို ၀င်စီးခဲ့တဲ့ အဲဒီအချိန်က အစိုးရတပ်က ဗိုလ်မှူးကြီးတစ်ယောက်ဖြစ်ခဲ့သူ ဂူတီယာရက်စ်ပါပဲ။ ငြိမ်းချမ်းရေးယူပြီးတော့ ၀န်ကြီးချုပ်က သူ့ကိုလုံခြုံရေးအရာရှိချုပ်အဖြစ် ပြန်ခန့်ခဲ့တာပါ။ ဂူတီယာရက်စ်က အယ်လ်ကွန်ဒိုနဲ့ သံအမတ်ကြီးတို့ လုံးနေကြပြီလို့ပြောတဲ့အခါမှာ ၀န်ကြီးချုပ်တွေ့သွားပါတယ်။ သံအမတ်ကြီးဟာ အီတလီကို မပြန်ခင်မှာ တောင်ကုန်းတစ်ခုပေါ်တက်တဲ့ သံကြိုးဆွဲယာဉ်(cable-car) ဖွင့်ပွဲတစ်ခုကို တက်ပါတယ်။ ပထမဆုံးထွက်တဲ့ ကေဘယ်လ်ကားပေါ်ကို သံအမတ်ကြီးကို ဂုဏ်ပြုတဲ့အနေနဲ့ စီးခိုင်းပါတယ်။ အဲဒီကေဘယ်ကားဟာ လမ်းတစ်ဝက်မှာ ပေါက်ကွဲပြီး သံအမတ်ကြီး ကွယ်လွန်သွားခဲ့ပါတယ်။ သံအမတ်ကြီးအတွက် ၀န်ကြီးချုပ်က အထိမ်းအမှတ်ကျောက်တိုင်တစ်တိုင် စိုက်ထူပေးပါတယ်။ နောက်မကြာမီ ဒက်ဇ်ကော်တီဂွိုင် ကို လိုက်လာတဲ့အခါ ၀န်ကြီးချုပ်က ဒက်ဇ်ကို သိပ်အရေးကြီးတဲ့ အကူအညီတစ်ခုကို တောင်းပါတယ်။ အဲဒါကတော့ အယ်လ်ကွန်ဒိုနဲ့ ငြိမ်းချမ်းရေး ရယူနိုင်အောင် ကြားဝင်စေ့စပ်ပေးဖို့ပါပဲ။ အယ်လ်ကွန်ဒိုဟာ တော်လှန်ရေးတုန်းက ဒက်ဇ်တို့အဖေနဲ့ အတူရှိခဲ့သူဖြစ်ပါတယ်။ ဒက်ဇ်ကြားဝင်ပေးတဲ့အခါမှာ အယ်ကွန်ဒိုလည်းယုံပြီး အစိုးရနဲ့ငြိမ်းချမ်းရေး ယူလိုက်ပါတယ်။ ဒါပေမဲ့ ငြိမ်းချမ်းရေးယူတဲ့ ညမှာပဲ လုံခြုံရေးအရာရှိချုပ် ဂူတီယာရက်ဇ်ရဲ့ တပ်ဖွဲ့ဝင်တွေက အယ်လ်ကွန်ဒို အပါအ၀င် သူ့လူတွေအားလုံးကို ညဘက်မှာ အလစ်အငိုက်ယူပြီး ချေမှုန်းပစ်လိုက်ကြပါတယ်။ ဂူတီယာရက်ဇ်ကိုလည်း ဒက်ဇ်နဲ့ဖက်ကက်တို့က သတ်နိုင်ခဲ့ပါတယ်။ ဒါပေမဲ့ အယ်လ်ကွန်ဒိုရဲ့သားကတော့ ဒက်ဇ်ကို ကမ္ဘာမကျေတော့ပါဘူး။

နောက်ကော်တီဂွိုင်ရဲ့တောင်ကုန်းတွေပေါ်က သူပုန်အုပ်စုတစ်စုဟာ အင်အားထွားလာပြီး လက်ရှိအစိုးရရဲ့ တပ်ဖွဲ့တွေအပေါ်မှာ အောင်နိုင်သွားပြန်ပါတယ်။ အဲဒီ သူပုန်ဗိုလ်ဟာ ဒက်ဇ်နဲ့ သဘောထားချင်း တိုက်ဆိုင်တဲ့သူပါ။ ဗိုလ်ချုပ်ကြီးရိုဂျိုရဲ့ နန်းတော်ထဲကို သူတို့တစ်တွေရောက်သွားတဲ့အခါ နန်းတော်အပြင်ဘက်က သွေးဆူနေတဲ့လူအုပ်ကြီးက အာဏာရှင်ရိုဂျိုကို အပြင်ထုတ်ပေးဖို့ ၀ိုင်းအော်နေကြပါတယ်။ သူပုန်ဗိုလ် “လိုဘို”က ပြည်သူ့ဆန္ဒကို အလေးထားတဲ့အနေနဲ့ “ရိုဂျို့ကို ငါ့ နန်းတော်ထဲက အပြင်ဆွဲထုတ်သွားပြီး ပြည်သူ့လက်ထဲ အပ်လိုက်ကြ”လို့ အမိန့်ပေးလိုက်ပါတယ်။ အဲဒီအချိန်မှာ လိုဘိုရဲ့လေယူလေသိမ်းနဲ့ မျက်နှာပေးကိုကြည့်ပြီး ဒက်ဇ် သံဝေဂတွေ ရသွားပါတယ်။ လူဆိုတာ တော်လှန်ရေးကာလမှာ ဘာတွေကိုပဲကြွေးကြာ်ခဲ့ ကြွေးကြာ်ခဲ့ အာဏာရယ် ငွေရယ် မိန်းမရယ်တို့နဲ့တွေ့တဲ့အခါ ခံနိုင်ရည်မရှိကြတော့ဘဲ ပြောင်းလဲသွားလေ့ရှိကြပါလား။ အားလုံး ဒီပုံစံအတိုင်း ဒီပုတ်ထဲက ဒီပဲ ပဲဖြစ်သွားကြပါလားဆိုတာကို ဒက်ဇ် သိသွားခဲ့ရပါတယ်။ နောက်တော့ ရိုဂျိုက အပြင်ဘက်မှာစောင့်နေတဲ့ လူအုပ်ကြီးရဲ့ တစ်စစီဆုတ်ဖြဲပြီး အသတ်ခံရမှာနဲ့စာရင် စစ်သားကောင်းတို့ရဲ့သေချင်းမျိုးနဲ့ သေလိုတဲ့အတွက် ဒက်ဇ်ကို “မင့်အဖေကို သတ်ဖို့ ငါကိုယ်တိုင်စီစဉ်ခဲ့တာ”လို့ပြောလို့ ဒက်ဇ်က ရိုဂျို့ကို ခြောက်လုံးပြူးနဲ့ ပစ်သတ်လိုက်ပါတယ်။ ဇာတ်လမ်းရဲ့အဆုံးမှာတော့ အယ်လ်ကွန်ဒိုရဲ့သားက မှန်ပြောင်းပါ သေနတ်နဲ့ချောင်းပစ်လို့ ဒက်ဇ်ဟာ သူ့အဖေရဲ့ကျောက်တိုင်ခြေရင်းမှာပဲ သေခဲ့ရပါတယ်။

ဒက်ဇ်ရဲ့အဖေပြောခဲ့သလို အာဏာရှင်စနစ်ကို အာဏာနဲ့ပြန်တိုက်လို့ မရနိုင်ဘူး။ ငြိမ်းချမ်းရေးမရဘဲ တိုင်းပြည်အတွင်းမှာ သွေးချောင်းစီးတာပဲ အဖတ်တင်လိမ့်မယ်။ လက်နက်ကို လက်နက်နဲ့ အနိုင်ယူလိုက်ရင် လက်နက်ကပဲ အမှန်တရားဖြစ်သွားလိမ့်မယ်။ တိုင်းပြည်အတွင်းမှာ တကယ်အမှန်တရားအတိုင်းပဲဖြစ်ဖို့ အမှန်တရားကိုပဲ လက်ကိုင်ထားပြီး တိုက်ပွဲဝင်မှ လူရောနတ်ပါ ချမ်းသာလိမ့်မယ်ဆိုတာကို ကော်တီဂွိုင်က အာဏာရှင်တွေမသိကြပေမယ့် ဒီဇာတ်ကားကို ကြည့်မိကြသူတွေအားလုံးက သတိပြု လိုက်မိကြပါတယ်။

( Adventurers ရုပ်ရှင်ဇာတ်ကားမှ ဇာတ်ဝင်ခန်းတစ်ခန်း)

Aye Chan Mon# Credit To : Eleven Media Group
သတင်းအစုံကို https://www.facebook.com/excellencemediaတွင်ဝင်ရောက်ကြည့်ရှုနိုင်ပါသည်။