(ဆောင်းပါးရှင် - ဒေါက်တာခင်မောင်ညို)
"ကိုဘသစ် ဗိုလ်ချုပ်အောင်ဆန်း အတ္ထုပ္ပတ္တိ ရုပ်ရှင်ကို ရိုက်ကြမယ်ဆို"
"ရိုက်မယ်လေကွာ၊ ဘာဖြစ်လို့လဲ"
"ဒီဇာတ်လမ်းက ဇာတ်သိမ်းခန်းကို သိပြီးသားပဲဆိုတော့ ကြည့်တဲ့လူတွေ များပါ့မလား"
"ကြည့်ကြမှာပါ။ ဒါက မှတ်တမ်းအဖြစ် ထားရမယ့် အကြောင်းအရာပဲ။ ရုပ်ရှင်ကို ကြည့်မယ်လို့ ကျွန်တော်တော့ ထင်တာပဲ။ လွန်ခဲ့တဲ့လက ကျွန်တော် ၉/၁၁ မှတ်တမ်းရုပ်ရှင်ကို ကြည့်မိသေးတယ်"
"ဟုတ်လား။ ၉/၁၁ ဆိုတာ အမေရိကန်ပြည်ထောင်စု နယူးယောက်က (World Trade Center) ကို လေယာဉ်တွေနဲ့ ၀င်တိုက်တဲ့အကြောင်း မဟုတ်လား"
"ဟုတ်တယ်။ တကယ်တော့ ဒီတိုက်ခိုက်မှုဟာ အင်မတန် ထိရောက်တဲ့ အမေရိကန်ကို ပြည်ပတိုက်ခိုက်မှုပါပဲ"
"ဒါကတော့ကွာ အမေရိကန် ပြည်ထောင်စုဆိုတာ ကမ္ဘာသစ်လို့ခေါ်တဲ့ အရပ်ပါ။ သူ့ဆီကို အရှေ့ကသွားသွား အနောက်ကသွားသွား သမုဒ္ဒရာကို မိုင်လေးငါးထောင် ဖြတ်သွားမှ ရောက်တယ်။ ဒါကြောင့် ပထမ ကမ္ဘာစစ်ရော ဒုတိယ ကမ္ဘာစစ်ပါ အမေရိကန် မြေပြင်ပေါ်မှာ မဖြစ်ခဲ့ဘူး။ တစ်ခုတော့ ရှိတယ်။ ၁၈၁၄ ခုနှစ်မှာ ဗြိတိသျှ စစ်သားတွေဟာ အိမ်ဖြူတော်ကို လာရောက်မီးရှို့ ဖူးတယ်"
"အမေရိကန်ရဲ့ အခြားနိုင်ငံမှာဖြစ်တဲ့ စစ်တွေကတော့ အများကြီးပဲ။ ဒုတိယ ကမ္ဘာစစ်မှာ ဂျပန်ကို အဏုမြူဗုံးကြဲခဲ့တယ်။ နောက်ကိုရီးယားစစ်ပွဲတို့ ဗီယက်နမ် စစ်ပွဲတို့မှာလည်း ပါဝင်ခဲ့တယ်"
"ဘာကြောင့် ဒီ ၉/၁၁ ကို လူတွေစိတ်ဝင်စား ရတာလဲ"
"သူတို့နိုင်ငံမှာ ဒီလိုဖြစ်တာ နံနက် ၈ နာရီလောက်က စတယ်။ ၁၀ နာရီလောက်မှာ အဲဒီ (World Trade Center) က Twin Tower စပြီးပြိုတယ်။ အဲဒီအချိန်ဟာ အာရှတိုက်မှာ ည ၈ နာရီကျော်ကျော် လောက်တွေပေါ့။ ဥရောပမှာ ညနေ ၆ နာရီ လောက်ကနေ စကြည့်နိုင်တာပေါ့။ အချိန်က လူတွေ တီဗွီကြည့်တဲ့ အချိန်ကောင်းပဲ။ ဒါကြောင့် တစ်ကမ္ဘာလုံးက Twin Tower ပြိုတာကို တွေ့ရတယ်။ အင်မတန် ခိုင်ခံ့ပြီး ငလျင်ဒဏ် ခံနိုင်တဲ့ အဆောက်အအုံဟာ လက်နက်မပါပဲ ဖြိုချတာလည်း ပါတာပေါ့လေ"
"လေယာဉ်က လေးစင်းဟုတ်လား"
"ဟုတ်တယ်။ နှစ်စင်းက Twin Tower ကို တိုက်တယ်။ အထပ် ၁၁၀ ရှိတဲ့ အဆောက်အအုံမှာ ၉၃ ထပ်နဲ့ ၉၉ ထပ်အကြားမှာ ပထမ လေယာဉ်က ၀င်တိုက်တာ။ ဒုတိယ လေယာဉ်ကတော့ နောက် ၁၁၀ ထပ်ရှိတဲ့ အဆောက်အအုံရဲ့ ၈၃ ထပ်ကို ၀င်တိုက်တာ။ အဲဒီ လေယာဉ်တွေဟာ ဘိုးအင်း ၇၆၇ လေယာဉ်တွေပါ။ လောင်စာအပြည့် ပါတယ်"
"နောက်နှစ်စင်းကရော"
"တစ်စင်းက ပင်တဂွန်ကို တိုက်တယ်။ ကျွန်တော်ကြည့်တာက United Airlines Flight 93 အကြောင်းပါပဲ။ သူက နံနက် ၈ နာရီ မိနစ် ၄၀ မှာမှ နယူးအတ်လေဆိပ်ကနေ ထွက်တယ်။ လေယာဉ်လေးစင်းအနက် နောက်ဆုံးလေယာဉ်ပဲ။ လေယာဉ်စီး ခရီးသည်တွေဟာ လေယာဉ်အပိုင်စီး ခံရတာကို သိတဲ့အချိန်မှာ နယူးယောက်က Twin Tower စပြီးတိုက်ခိုက် ခံရတာကို သိနေကြပြီဖြစ်တယ်။ သူတို့ဟာ လက်ကိုင်ဖုန်းတွေက တစ်ဆင့် သတင်းတွေ ကြားနေတယ်။ ဒီလေယာဉ်ဟာ ၀ါရှင်တန်ဒီစီကို မောင်းနေတယ်"
"ဘာကိုတိုက်မလို့လဲ"
"အမေရိကန်က ထင်ရှားတဲ့ အမှတ် (icon) တွေကို တိုက်ဖို့ ကြိုးစားတာ ဖြစ်မှာပေါ့။ အတိအကျတော့ ဘယ်သူမှမသိဘူး။ ထူးခြားတာက အဲဒီလေယာဉ်ပေါ်က လူတွေဟာ တိုင်ပင်ခွင့်ရတယ်။ လေယာဉ်စီး ခရီးသည်တွေက သူတို့ဟာ သေလူပဲ။ ဒီတော့ လေယာဉ်ပစ်မှတ်ကို မရောက်အောင် တိုက်ခိုက်ဖို့ ကြိုးစားတယ်လို့ ဆိုတယ်"
"ဒီလိုကြိုးစားတာကို ဘယ်လိုလုပ်သိလဲ"
"သူတို့တစ်တွေဟာ လက်ကိုင်ဖုန်းတွေနဲ့ ဆက်ပြောကြတယ်။ နောက်ဆုံးလေယာဉ်စီး ခရီးသည် တစ်ယောက်ဟာ သူတို့အစည်းအဝေးလုပ် ဆုံးဖြတ်တာတွေကို လက်ကိုင်ဖုန်းကတစ်ဆင့် သူ့မိတ်ဆွေတွေကို ကြားရအောင်ဖွင့် ထားပေးခဲ့တယ်"
"တကယ်ဟုတ်ပါလား။ တိုက်ခိုက်ပုံကို ပြောပါဦး"
"တိုက်ခိုက်ပုံကိုတော့ မကြားရတော့ဘူး။ တိုက်ခိုက်ခါနီး စကားကိုတော့ ကြားရတယ်"
"အဲဒါဘာလဲ"
"Are you ready? Then, OK, let’s roll." ဆိုတာပါပဲ။ အဆင်သင့် ဖြစ်ပြီလား။ ကောင်းပြီ။ ချကြစို့" ပေါ့။ အမေရိကန်မှာ တစ်ခုခု လုပ်တော့မယ်ဆိုရင် "let’s roll" ဆိုတဲ့ စကားဟာ ခေတ်စားခဲ့တာပဲ"
"ဟုတ်ပါတယ်။ ကျွန်တော်တို့လည်း ဗိုလ်ချုပ်အောင်ဆန်း ဇာတ်ကားထဲက စကားတွေကိုရမှာ အသေအချာပဲ"
"ကျွန်တော်လည်း စဉ်းစားနေတာ။ ပန်းတိုင်မရောက်ခင် တက်မထောင်နဲ့ ဆိုတာမျိုးပေါ့"
"လမ်းပေါ်ထွက် ဆေးရိုးမလှန်းကြနဲ့ ဆိုတာကော"
"ကွဲနေအောင် လုပ်မှ။ ပြဲနေအောင် လုပ်မှ ဆိုတာလည်း ကျန်နေမှာပဲ"
"ကြည်ရေ၊ ပဲပြုတ်နဲ့နံပြား စားချင်တယ် ဆိုတာလည် ကျန်နေနိုင်တာပဲ"
"ကျွန်တော်တော့ မဟတ္တမဂန္ဒီရဲ့ အတ္ထုပ္ပတ္တိကို ကြည့်ရတာ သဘောအရမ်း ကျခဲ့တယ်"
"ဂန္ဒီကြီးကို ရုံးထုတ်လာတဲ့ အခန်းပဲ။ ဂန္ဒီလက်ထိတ်နဲ့ ရုံးထဲဝင်လာတော့ လူတွေက မတ်တတ်ရပ်တယ်။ ဒါကို ဗြိတိသျှ အရာရှိကြီးက ထိုင်ခိုင်းတယ်။ လူတွေမထိုင်ဘူး။ ရဲတွေရပ်တယ်။ ရှေ့နေတွေလည်း မတ်တတ်ရပ်တယ်။ နောက်ဆုံး တရားသူကြီးပါ မတ်တတ်ရပ်တယ်လေ"
"ဂန္ဒီရဲ့အရှိန်ပေါ့ဗျာ"
"ဟုတ်တယ်။ ဂုဏ်သိက္ခာ အင်မတန် ကြီးမားသူပါ။ ဒါမျိုးကို ပေါ်လွင်အောင် ရိုက်ပြမယ်လို့တော့ မျှော်လင့်တာပဲ"
"ကမ္ဘာကြီးမှာ လူဆိုးတွေနဲ့ လူကောင်းတွေ အားပြိုင်လာတာတွေဟာ ရှေးအခါ ကတည်းကပဲ လက်နက်ဘယ်လို အားကိုးကိုး ရေရှည်မှာတော့ လူကောင်းတွေပဲ ကျန်ရစ်တယ်"
"ဟုတ်တယ်။ အမြော်အမြင် တစ်ထွာတစ်မိုက်နဲ့ လူတစ်ယောက်ကို အပြတ်ရှင်းလိုက်ရင် ဇာတ်သိမ်းသွားမယ်လို့ ထင်နေကြတယ်"
"ဒါဟာ မှားတာပဲလေ။ ကိုရီးယားမှာ ပတ်ချုံဟီးကို အပြတ်ရှင်းခဲ့တယ်။ ခုသူ့သမီး သမ္မတ ဖြစ်တာပဲ။ ပါကစ္စတန်မှာ အလီဘူတိုကို ရှင်းတယ်။ ဘူတို့သမီး ဘက်နီဇာဘူတို ၀န်ကြီးချုပ် ဖြစ်လာတာပဲ။ အများကြီး ရှိတယ်"
"ခုလည်း မြန်မာနိုင်ငံမှာ ဗိုလ်ချုပ်သမီးကို အားလုံးက မျှော်နေကြတာပဲ။ ဒါပေမဲ့ ဒီလိုသတ်တာတွေဟာ တိုင်းပြည်အတွက် အများကြီး နစ်နာတယ်။ နိုင်ငံတကာမှာ ဘယ်လောက် မျက်နှာငယ်ကြ ရလဲ။ တို့မြန်မာတွေ အိမ်နီးနားချင်းတွေမှာ ကျွန်သွားခံရတယ်။ ဗိုလ်ချုပ်ရှိရင် ရင်နာလို့ဆုံးမှာ မဟုတ်ဘူး။ ဒီနေ့ထိ မြန်မာနိုင်ငံ နာလန်မထူ သေးဘူး"
"ဟုတ်ပါတယ်။ တကယ်တော့ ကောင်းတဲ့ဇာတ်သိမ်းကိုပဲ ကြည့်ချင်ပါတယ်။ ဗိုလ်ချုပ်ကျဆုံးတော့ ကျွန်တော် သုံးလေးနှစ်ပဲ ရှိသေးတယ်။ နေ့လယ်လောက်မှာမှ ဘီလူးကျွန်းကလူတွေ သိကြတယ်။ ကျွန်တော်တို့ တစ်အိမ်လုံး ရွာတစ်ရွာလုံး ငိုလိုက်ကြတာ။ ကျွန်တော် အိမ်ထဲမှာနေတာတောင် အသံအကျယ်ကြီး ကြားရတယ်"
"ဗိုလ်ချုပ်ဇာတ်ကားမှာတော့ ဇာတ်သိမ်းမှာတော့ ငိုကြမှာပဲ"
"ဟုတ်ပါရဲ့။ ဇာတ်သိမ်းခန်းကို သိပေမယ့် ဒီဇာတ်ဟာ ဘယ်တော့မှ ဆုံးသွားမှာ မဟုတ်ဘူး ဆိုတာကိုတော့ သိစေချင်ပါတယ်"
"ကမ္ဘာ မကျေပါဘူး"
အေးချမ်းမွန် Credit To >Eleven Media Group
Post a Comment