စာနယ်ဇင်းကောင်စီ (ယာယီ)၏ မီဒီယာကျင့်ဝတ်ထုတ်ပြန်ပွဲတွင် စာနယ်ဇင်းကောင်စီ(ယာယီ)၏ လုပ်ဆောင်မှုများနှင့် ပတ်သက်၍ စာနယ်ဇင်းသမားများက ဆွေးနွေးပွဲကျင်းပစဉ်မှာပင် ဝေဖန်ခဲ့ကြ

Published on: May 4, 2014
Written by: သတင်းအယ်ဒီတာအဖွဲ့

မြန်မာနိုင်ငံ စာနယ်ဇင်းကောင်စီ (ယာယီ)က မြန်မာသတင်းစာဆရာများ သတင်းမီဒီယာကျင့်ဝတ် အတည်ပြုထုတ်ပြန်ခြင်းအခမ်းအနားနှင့် ဆွေးနွေးမှုကို မေ ၃ ရက်က ဆီဒိုးနားဟိုတယ်၌ ကျင်းပခဲ့ရာ ထိုဆွေးနွေးပွဲ ကျင်းပနေစဉ်မှာပင် စာနယ်ဇင်းကောင်စီ (ယာယီ)၏ လုပ်ဆောင်ချက်များနှင့်ပတ်သက်၍ ဝေဖန်ခဲ့မှုများ ရှိခဲ့သည်။

ထိုအခမ်းအနားသို့ ပြည်တွင်းပြည်ပ သတင်းမီဒီယာအသီးသီးမှ သတင်းစာဆရာ ၂၀၀ ၀န်းကျင်ခန့် တက်ရောက်ခဲ့ပြီး အခမ်းအနားအား မြန်မာသတင်းမီဒီယာကျင့်ဝတ်၊ ကိုယ်တိုင်ထိန်းကျောင်းဆောင်ရွက်ခြင်း၏ လူမှုအဖွဲ့အစည်းနှင့် သတင်းလုပ်ငန်းအပေါ် အကျိုးသက်ရောက်မှုများ၊ သတင်းမီဒီယာကျင့်ဝတ်နှင့်ပတ်သက်ပြီး သိရှိလိုက်နာဆောင်ရွက်ရေး အမြင်ဖလှယ်ဆွေးနွေးခြင်း၊ သတင်းမီဒီယာကျင့်ဝတ်ကို လိုက်နာဆောင်ရွက်ရန် ကတိပြုခြင်းစသည့် အစီအစဉ်လေးရပ်ဖြင့် ပြုလုပ်ခဲ့သည်။

မြန်မာနိုင်ငံစာနယ်ဇင်းကောင်စီ (ယာယီ)က ထုတ်ပြန်ခဲ့သော သတင်းမီဒီယာကျင့်ဝတ်များတွင် တစ်သီးပုဂ္ဂလများ၏ အခြေခံရပိုင်ခွင့်များနှင့် ကောင်စီ၏အခန်းကဏ္ဍ၊ မီဒီယာဌာနများ၏ တာဝန်ဝတ္တရားများနှင့် မီဒီယာအစီအစဉ်များဆိုင်ရာ ကျင့်ဝတ်များ အစရှိသဖြင့် ၂၈ ချက် ပါဝင်သည်။

မြန်မာစာနယ်ဇင်းကောင်စီ(ယာယီ)က အဆိုပါကျင့်ဝတ်များ ထုတ်ပြန်နိုင်ရေးအတွက် နိုင်ငံတကာမီဒီယာပံ့ပို့ရေးအဖွဲ့ (IMS) နှင့် ပူးပေါင်းပြီး မြန်မာသတင်းစာဆရာများ သတင်းမီဒီယာကျင့်ဝတ်ဖွံ့ဖြိုးတိုးတက်ရေးစီမံကိန်းကို ၂၀၁၄ ခုနှစ်၊ ဇန်န၀ါရီ ၁ ရက် တွင် စတင်အကောင်အထည်ဖော် ဆောင်ရွက်ခဲ့ခြင်းဖြစ်သည်။

စီမံကိန်းလုပ်ငန်းစဉ်များအရ ထုတ်ပြန်ထားသော သတင်းမီဒီယာကျင့်ဝတ်(မူကြမ်း)ကို အမျိုးသားအဆင့် ဘုံသဘောတူညီချက်ရရှိရန် မြန်မာနိုင်ငံအနှံ့ရှိ စာနယ်ဇင်းသမားများ၊ သတင်းစာဆရာများ၏ အကြံဥာဏ်တောင်းခံသည့် အလုပ်ရုံဆွေးနွေးပွဲများ ကျင်းပခဲ့သည်ဟု သိရသည်။ အဆိုပါဆွေးနွေးပွဲများမှ ရရှိလာသောတုံ့ပြန်ချက်၊ အကြံပြုချက်များအားအခြေပြု၍ ယခုသတင်းမီဒီယာကျင့်ဝတ်ကို အပြီးသတ် တည်းဖြတ်ရေးဆွဲခဲ့ခြင်းဖြစ်သည်ဟု ကျင့်ဝတ်ဖြစ်ပေါ်လာရန် ကြိုးပမ်းဆောင်ရွက်ခဲ့မှုများနှင့် ပတ်သက်၍ စာနယ်ဇင်းကောင်စီ(ယာယီ)အဖွဲ့ဝင်တစ်ဦးဖြစ်သူ ဦးဇော်သက်ထွေးက အကျဉ်းချုပ် ရှင်းလင်းခဲ့သည်။

ဆက်လက်၍ စာနယ်ဇင်းကောင်စီမှ ထုတ်ပြန်ခဲ့သည့် သတင်းမီဒီယာကျင့်ဝတ်များနှင့် ပတ်သက်၍ ဆွေးနွေးမှုများပြုလုပ်ခဲ့ရာတွင်ဒေါက်တာခင်မောင်ညိုက “သတင်းမီဒီယာတွေကို ကျင့်ဝတ်နဲ့ထိန်းကျောင်းမှုများ ပြုလုပ်တာ ကောင်းပါတယ်။ ဥပဒေအရ ထိန်းကျောင်းမှုတွေလည်း ရှိနိုင်ပါတယ်။ ဒါပေမဲ့ တရားရေးမဏ္ဍိုင် ခိုင်မာဖို့တော့လိုပါတယ်။ သတင်းထောက်တွေနဲ့ သတင်းမီဒီယာများသာ အမြဲတမ်းလိုလို အရေးယူခံနေရတယ်ဆိုတာတော့ သိပ်အဓိပ္ပာယ်မရှိပါဘူး။ တရားဥပဒေအရ မမှန်မကန် ဆုံးဖြတ်ခဲ့သည့် တရားသူကြီးများကိုရော အရေးယူမှာလား။ အဲဒီအတွက်ရော ဥပဒေရှိရဲ့လား။ အဲဒီတော့ မှန်မှန်ကန်ကန်လေး လုပ်ကြပါ။ အားလုံး ရှင်းရှင်းလင်းလင်း သိရအောင်ချပြပါ။ တစ်ယောက်နဲ့တစ်ယောက် Respect ရှိရှိနဲ့ လုပ်ကြဖို့ မေတ္တာရပ်ခံပါတယ်။ အခုထုတ်ပြန်လိုက်တဲ့ သတင်းမီဒီယာကျင့်ဝတ်မှာ သတင်းစာဆရာများရဲ့ အခွင့်အရေးနဲ့ပတ်သက်လို့ရော ဘာတွေပေးနိုင်မလဲ ကျွန်တော်သိချင်ပါတယ်”ဟု မေး မြန်းခဲ့သည်။

ဒေါက်တာ ခင်မောင်ညို၏ မေးမြန်းချက်ကို စာနယ်ဇင်းကောင်စီ(ယာယီ)အဖွဲ့ဝင်တစ်ဦးဖြစ်ပြီး မြန်မာနိုင်ငံ သတင်းစာဆရာအသင်းဥက္ကဋ္ဌ ဦးကိုကို(ကိုကို-စက်မှုတက္ကသိုလ်)က ပြန်လည်ဖြေကြားခဲ့ရာတွင် ယနေ့အခမ်းအနားသည် ကျင့်ဝတ်နှင့်သာဆိုင်သည့် အခမ်းအနားဖြစ်သောကြောင့် ရပိုင်ခွင့်များကို မဖော်ပြထားခြင်းဖြစ်ကြောင်း၊ မြန်မာနိုင်ငံ စာနယ်ဇင်းကောင်စီက ရေးဆွဲထားပြီး သမ္မတက လက်မှတ်ရေးထိုးခဲ့သည့် သတင်းမီဒီယာဥပဒေအခန်း (၃) တွင် ရပိုင်ခွင့်များ ထည့်ထားပြီးဖြစ်ကြောင်း ပြန်လည်ဖြေရှင်းခဲ့သည်။

ထို့နောက် စာရေးဆရာမကြီး ရွှေကူမေနှင်းက လွှတ်တော်တွင် သတင်းမီဒီယာဥပဒေ သုံး၊ လေးမျိုးဖြစ်နေသည်ကို တစ်ခုတည်းဖြစ်အောင် မည်သို့လုပ်ကြမည်နည်းဟု စာဖြင့်မေးမြန်းခဲ့ရာ စာနယ်ဇင်းကောင်စီက ရေးဆွဲသည့် ဥပဒေမှလွဲ၍ ကျန်သည့် ဥပဒေများကို စာနယ်ဇင်းကောင်စီအနေဖြင့် မလိုလားသော်လည်း ပြန်ကြားရေးဝန်ကြီးဌာနဘက်မှ ရေးဆွဲပြီးတင်ခြင်းဖြစ်ကြောင်း၊စာနယ်ဇင်းကောင်စီအနေဖြင့် တတ်နိုင်သမျှ အကြံပြုချက်များ ပြုလုပ်ခဲ့သော်လည်း ဥပဒေများကို လုပ်သင့်သည်၊ မလုပ်သင့်သည် ပြောဆိုရန်အတွက်မှာ နိုင်ငံရေးသမားများနှင့် လွှတ်တော်အမတ်များ၏ တာဝန်သာဖြစ်ကြောင်းကို မြန်မာနိုင်ငံ စာနယ်ဇင်းကောင်စီ (ယာယီ) အဖွဲ့ဝင် ဦးသီဟစောက ပြန်လည်ဖြေကြားခဲ့သည်။

အခမ်းအနားသို့ တက်ရောက်လာသူများက မြန်မာနိုင်ငံစာနယ်ဇင်းကောင်စီ (ယာယီ)က ထုတ်ပြန်ခဲ့သည့် သတင်းမီဒီယာကျင့်ဝတ်များနှင့် ပတ်သက်၍ တုံ့ပြန်ဝေဖန်မှုများပြုလုပ်ရာတွင် ကျင့်ဝတ်များထုတ်ပြန်သည့်နည်းတူရပိုင်ခွင့်နှင့် အခွင့်အရေးများအကြောင်း၊ သတင်းစာဆရာများနည်းတူ အခြားအစိုးရအဖွဲ့အစည်းများအနေဖြင့်လည်း ကျင့်ဝတ်လိုက်နာသင့်၊ မသင့်တို့ကို ဝေဖန် ကြပြီး သတင်းမီဒီယာသမားများအပေါ် အကာအကွယ်ပေးခြင်းနှင့်ပတ်သက်၍ မြန်မာနိုင်ငံစာနယ်ဇင်းကောင်စီ(ယာယီ)၏ လုပ်ဆောင်မှုများကိုလည်း မေးခွန်းထုတ်ပြောဆိုခဲ့ကြသည်။

ကရင်ပြည်နယ်မှ သတင်းထောက် ကိုဇော်ရဲထက်က စာနယ်ဇင်းသမားများနှင့် ပတ်သက်၍ လက်ရှိအချိန်တွင် အရေးယူခံရနိုင်သည့် ဥပဒေသုံးခုရှိနေပြီး ထိုဥပဒေများဖြင့် ဆုံးဖြတ်ပြီး ပုဂ္ဂိုလ်တစ်ဦးဦးမှ ကျေနပ်မှုမရှိပါက အသရေဖျက်မှုဥပဒေကဲ့သို့သော ပုဒ်မ ၅၀၀ ဖြင့် အရေးယူခံရနိုင်သည့်အပြင် ဒဏ်ငွေသာမက ထောင်ဒဏ်ပါ ချမှတ်ခံရနိုင်သည့် အခြေအနေရှိနေသည်ဟု ဆိုသည်။

“မီဒီယာသမားက မီဒီယာနဲ့ပတ်သက်လာရင် အမှုကိစ္စတွေမှာ စာနယ်ဇင်းကောင်စီ ရဲ့ ပြစ်မှုပြစ်ဒဏ်သည်သာ အကျုံးဝင်သည်ဆိုတဲ့အချက်ကို ပယ်ဖျက်ထားတာ တွေ့ရပါ တယ်။ ဘာလို့ပယ်ဖျက်ထားတာပါလဲ။ စာနယ်ဇင်းကောင်စီဟာ အစိုးရရဲ့ပြယုဂ်၊ ပြယုဂ် ဖြစ်တယ်ထားပါ။ ကျွန်တော်တို့ သတင်းသမားတွေနဲ့ စာနယ်ဇင်းကောင်စီနဲ့ကြားမှာ စာနယ်ဇင်းကောင်စီက ဦးဆောင်နေတဲ့ ပုဂ္ဂိုလ်တွေကို ဂုဏ်သိက္ခာညှိုးနွမ်းအောင် လုပ်တယ်ပဲထားပါ။ ကျွန်တော်ကတော့ အဲဒီလိုပဲထင်ပါတယ်”ဟု ကိုဇော်ရဲထက်က ဝေဖန်ခဲ့သည်။

မကွေးတိုင်းဒေသကြီး သတင်းစာဆရာအသင်း ဥက္ကဋ္ဌဒေါက်တာသက်လွင်ကလည်း စာနယ်ဇင်းကောင်စီကို မြန်မာနိုင်ငံဆေးကောင်စီနှင့် နှိုင်းယှဉ်တင်ပြသွားပြီး စာနယ်ဇင်းကောင်စီအနေဖြင့် မည်မျှလုပ်ပိုင်ခွင့် ရှိလာမည်ဆိုသည့်အချက်နှင့် အကယ်၍ စာနယ်ဇင်းကောင်စီသည် သတင်းမီဒီယာများအား အကာအကွယ်ပေးရေးအတွက် ကောင်းမွန်စွာလုပ်ဆောင်နိုင်ခြင်းမရှိပါက စာနယ်ဇင်းကောင်စီအား အယုံအကြည်ကင်းမဲ့မည်ဖြစ်ကြောင်းတို့ကို ပြောဆိုဆွေးနွေးခဲ့သည်။

နိုင်ငံတော်လျှို့ဝှက်ချက် ပေါက်ကြားစေမှုဥပဒေဖြင့် တရားစွဲဆိုခြင်းခံနေရသော ယူနတီဂျာနယ်မှ အမှုဆောင်အရာရှိချုပ်နှင့် သတင်းထောက်လေးဦး၏ အမှုကို လိုက်ပါဆောင်ရွက်ပေးနေသည့် ရှေ့နေ ဦးကျော်လင်း တက်ရောက်ခဲ့ပြီး ၎င်းကစာနယ်ဇင်းကောင်စီအနေဖြင့် ယူနတီဂျာနယ်ဖြစ်စဉ်အပါအ၀င် သတင်းမီဒီယာများ၏ အမှုအခင်းများကို အကာအကွယ်ပေးသည့် အနေအထားနှင့် ပတ်သက်၍ ဝေဖန်ပြောဆိုခဲ့သည်။

“အခု ယူနတီသတင်းထောက်တွေနဲ့ အမှုဆောင်အရာရှိချုပ်ကို စွဲဆိုတင်ပို့တဲ့အမှုဟာဆိုရင် ဘယ်လိုမှ ခေတ်နဲ့မလျော်ညီတော့တဲ့ ဥပဒေကြီးပါ။ ပထမကမ္ဘာစစ်အပြီးက ဥပဒေကြီးပါ။ သတင်းထောက်တွေကို တရားစွဲဖို့အတွက် လုံးဝအသုံးမပြုသင့်တဲ့ ဥပဒေပါ။ အဲဒါနဲ့ပတ်သက်လို့ စာနယ်ဇင်းကောင်စီ (ယာယီ)က ဘယ်လိုအကာအကွယ်ပေးမှုတွေ ပြုလုပ်ခဲ့ပါသလဲ”ဟု ဦးကျော်လင်းက မေးခွန်းထုတ်ခဲ့သည်။

အဆိုပါပြောဆိုချက်နှင့် ပတ်သက်၍ စာနယ်ဇင်းကောင်စီ (ယာယီ)အတွင်းရေးမှူး ဦးကျော်မင်းဆွေက ပြန်လည်ဖြေကြားခဲ့ရာတွင် ယူနတီသတင်းဂျာနယ်နှင့်ပတ်သက်၍ လွှတ်တော်၊ သမ္မတရုံးနှင့်ကာကွယ်ရေးဝန်ကြီးဌာန အစရှိသည့် သက်ဆိုင်သည့်ဝန်ကြီးဌာနများအား နှစ်ကြိမ်တိုင် တရားဝင်စာပို့ မေတ္တာရပ်ခံပြီးဖြစ်ကြောင်းနှင့် ကြေညာချက်လည်း ထုတ်ပြန်ထားပြီးဖြစ်ကြောင်းတို့ကို ပြန်လည်ဖြေကြားခဲ့သည်။

အခမ်းအနားအစီအစဉ်အရ မြန်မာသတင်းလောကတွင် ကိုယ်တိုင်ထိန်းကျောင်း ဆောင်ရွက်ခြင်းအခန်းကဏ္ဍနှင့် ပတ်သက်၍ မြန်မာနိုင်ငံစာနယ်ဇင်းကောင်စီ(ယာယီ)မှ အထွေထွေအတွင်းရေးမှူး ဦးကျော်မင်းဆွေက ရှင်းလင်းပြောကြားခဲ့သည်။

ထိုသို့ ပြောကြားရာတွင် မိမိအနေဖြင့် လက်ခုပ်သံရနိုင်မည့် စကားများသာပြောမည်မဟုတ်ကြောင်းနှင့် မိမိပြောဆိုသည့် စကားများမှာ လက်ခုပ်သံထက် ဆဲသံသာကြားရဖွယ်ရှိကြောင်း ဦးစွာပြောကြားခဲ့သည်။

ယင်းနောက် မြန်မာနိုင်ငံ၏ အပြောင်းအလဲသည် နှစ်ပေါင်း ၅၀ ကြာ အုပ်ချုပ်ခဲ့သည့်သူက အပြောင်းအလဲပြုလုပ်လာသည့်အတွက် ပြောင်းလဲလာခြင်းသာ ဖြစ်ကြောင်း၊ နှစ်ပေါင်းများစွာ အကြောက်တရားဖြင့် နေထိုင်ခဲ့ရသည့်နိုင်ငံအတွက် သုံးနှစ်တာအချိန်အတွင်း အများကြီးမျှော်လင့်ထား၍ မဖြစ်နိုင်ကြောင်းနှင့် မီဒီယာများအနေဖြင့်လည်း ကိုယ်တိုင်ထိန်းကျောင်းဆောင်ရွက်ခြင်း ပြုရမည်ဖြစ်ကြောင်း စသည်တို့ကို ပြောကြားခဲ့သည်။

ထို့အပြင် စာနယ်ဇင်း လွတ်လပ်ခွင့်နှင့်အတူ ကျင့်ဝတ်များအကြောင်းကိုလည်း ပြောဆိုရမည်ဖြစ်ဟု ၎င်းကဆိုသည်။ သတင်းထောက်များအနေဖြင့် မိမိကိုယ် ကိုယ် ထိန်းကျောင်းဆောင်ရွက်ရမည့် အပိုင်းတွင် ၀တ်စားဆင်ယင်မှုများဖြင့်လည်း ချိန်ထိုးပြောဆိုခဲ့သည်။ ဥပမာအနေဖြင့် ပွဲတစ်ပွဲကိုသွားသည်နှင့် သတင်းထောက်ဖြစ်သည့် အတွက် ထိုပွဲတွင် တက်ရောက်လာသူများကို သတ်မှတ်ထားသည့် စည်းကမ်းချက်နှင့် လွတ်ကင်းစရာမရှိဘဲ အများနည်းတူ ၀တ်စားဆင်ယင်မှု ရှိရမည်ဖြစ်ကြောင်း၊ သတင်းထောက်တစ်ဦးကိုမြင်သည်နှင့် သတင်းပေးချင်စိတ်ရှိအောင် ၀တ်စားဆင်ယင်သင့်သည်ဟု ဦးကျော်မင်းဆွေက ပြောကြားခဲ့သည်။

ဆက်လက်ပြီး စာနယ်ဇင်းကောင်စီ (ယာယီ)က ထုတ်ပြန်လိုက်သည့် သတင်းမီဒီယာကျင့်ဝတ်များနှင့် ပတ်သက်၍ ၎င်းကပြောကြားရာတွင် ယခုထုတ်ပြန်လိုက်သည့် ကျင့်ဝတ်များမှာ မလိုက်နာမနေရ၊ အတင်းအကျပ်လိုက်နာရမည့်အရာများ မဟုတ်ကြောင်း၊ မလိုက်နာ၍လည်း ဘာမျှလုပ်၍ မရကြောင်း၊ လိုက်နာသည် မလိုက်နာသည်ဆိုသည်မှာ ကိုယ့်သဘောနှင့် ကိုယ်သာဖြစ်ကြောင်းတို့ကိုလည်း ဦးကျော်မင်းဆွေက ပြောကြားခဲ့သည်။

ပြီးခဲ့သည့် ၂၀၁၃-၁၄ ကာလများအတွင်း သတင်းထောက်များအပေါ် ဖိနှိပ်မှုများ၊ ဖမ်းဆီးအရေးယူမှုများ၊ ထောင်ဒဏ်ချမှတ်ခြင်းများရှိခဲ့ပြီး ထိုကိစ္စရပ်များတွင် မြန်မာနိုင်ငံစာနယ်ဇင်းကောင်စီ(ယာယီ)က ကြားဝင်ဖျန်ဖြေဆောင်ရွက်ပေးမှုများအား နည်းခဲ့သည်။

အထူးသဖြင့် ၂၀၁၃ ခုနှစ် စက်တင်ဘာ ၁ ရက်က သမ္မတ၏ လယ်တောအိမ်၌ မြန်မာနိုင်ငံစာနယ်ဇင်းကောင်စီ (ယာယီ) အဖွဲ့ဝင်များနှင့် သမ္မတဦးသိန်းစိန်တို့ တွေ့ဆုံခဲ့ ပြီး အလှူငွေကျပ်သိန်း ၅၀၀ လက်ခံပြီး နောက်ပိုင်း စာနယ်ဇင်းကောင်စီ(ယာယီ)အပေါ် စာနယ်ဇင်းသမားများ၏ ယုံကြည်မှုကျဆင်းခဲ့ပြီး ပြည်သူလူထုထောက်ခံမှုလည်း ကျဆင်းခဲ့ပါသည်။ ထိုအချိန်နောက်ပိုင်း မြန်မာနိုင်ငံစာနယ်ဇင်းကောင်စီ(ယာယီ)၏ လုပ်ဆောင်ချက်များ ကျဆင်းခဲ့ပြီး သတင်းမီဒီယာ အငြင်းပွားမှုများ၌ ထိရောက်သော ၀င်ရောက်ဖြန်ဖြေမှုများ အားနည်းခဲ့ကြောင်း သိရသည်။

ထို့အပြင် ပြန်ကြားရေးဝန်ကြီးဌာနနှင့် ပူးပေါင်းလုပ်ကိုင်လျက်ရှိပြီး ဝေဖန်ခံနေရသည့် နိုင်ငံတကာမီဒီယာပံ့ပိုးရေးအဖွဲ့ (IMS) ၏ ထောက်ပံ့ကူညီမှုများကိုလည်း မြန်မာနိုင်ငံ စာနယ်ဇင်းကောင်စီ(ယာယီ)က လက်ခံရယူခဲ့ကာ ယခုထုတ်ပြန်ခဲ့သော ကျင့်ဝတ်များကိုလည်း IMS အကူအညီဖြင့် ရေးဆွဲထုတ်ပြန်ခဲ့ခြင်း ဖြစ်သည်။

လက်ရှိအချိန်တွင် သတင်းမီဒီယာဥပဒေသစ်ကို ပြဋ္ဌာန်းထားပြီးဖြစ်ကာ ထိုဥပဒေအရ ပေါ်ထွက်လာမည့် နည်းဥပဒေများဖြင့် မြန်မာနိုင်ငံစာနယ်ဇင်းကောင်စီ(ယာယီ)ကို အသစ်ရွေးကောက်တင်မြှောက်ရန် ရှိလာပြီဖြစ်သည်။

Aye Chan Mon# Credit To :Eleven Media Group
https://www.facebook.com/excellencemedia