စစ်မှန် ခိုင်မာသော ဒီမိုကရေစီစနစ် တည်ဆောက်နိုင်ရေးအတွက် အများယုံကြည် လက်ခံသော လွတ်လပ်၍ တရားမျှတသည့် ရွေးကောက်ပွဲများကို တူညီသော အခွင့်အရေးဖြင့် ဘက်လိုက်ခြင်းမရှိဘဲ ပွင့်လင်းမြင်သာစွာ ကျင်းပပေးရန် ပြည်ထောင်စု ရွေးကောက်ပွဲ ကော်မရှင်က ရေးဆွဲနေသော မဟာဗျူဟာ စီမံချက်အတွက် နိုင်ငံရေး ပါတီများထံမှ အကြံပြုချက် တောင်းခံထားကြောင်း သိရသည်။
ပြည်ထောင်စု ရွေးကောက်ပွဲ ကော်မရှင်က နိုင်ငံရေးပါတီများသို့ ပေးပို့ထားသည့် မဟာဗျူဟာ အစီအစဉ်တွင် အချက် ၁၂ ချက် ပါရှိပြီး အဆိုပါအချက်များတွင် ဥပဒေ၊ နည်းဥပဒေ၊ လုပ်ငန်းလမ်းညွန်၊ ညွှန်ကြားချက် များနှင့် လိုက်နာရန် ကျင့်ဝတ်များ ပြင်ဆင်ရေးဆွဲရေး၊ ပြည့်စုံမှန်ကန်သော မဲဆန္ဒရှင် စာရင်းပြုစုရေး၊ အစိုးရ အဖွဲ့အစည်းများ၊ နိုင်ငံရေး ပါတီများ၊ လူမှုရေး အဖွဲ့အစည်းများ၊ ပြည်တွင်းပြည်ပ စောင့်ကြည့် လေ့လာသူများနှင့် ပူးပေါင်းဆောင်ရွက်ရေး စသည့် အချက်များ ပါဝင်သည်။
ထို့အပြင် နိုင်ငံရေး ပါတီများနှင့် လွှတ်တော် ကိုယ်စားလှယ်လောင်းများအား ဥပဒေနှင့်အညီ ကြီးကြပ်ရေး၊ ရွေးကောက်ပွဲ အငြင်းပွားမှုများ ဖြေရှင်းရေး၊ ရွေးကောက်ပွဲ ကန့်ကွက်လွှာများ စီရင်ဆုံးဖြတ်ရေးနှင့် တိုင်းရင်း သားများ၊ အမျိုးသမီးများနှင့် မသန်စွမ်းသူများ ပါဝင်မှု မြှင့်တင်ရေး စသည့်အချက်များကိုလည်း မဟာဗျူဟာ ရည်မှန်းချက်များတွင် ထည့်သွင်းထားသည်။
အဆိုပါ မဟာဗျူဟာ အစီအစဉ်တွင် ပြင်ပအန္တရာယ်များအဖြစ် အကြမ်းဖက်ခြင်း၊ ခြိမ်းခြောက်ခြင်း၊ ဖိအားပေးခြင်း၊ စွက်ဖက်ခြင်း၊ တရားမဲ့ ပြုကျင့်ခြင်း၊ သဘာဝ ဘေးအန္တရာယ်၊ မမှန်သတင်းများ ထုတ်ပြန်ခြင်းနှင့် နိုင်ငံရေး တည်ငြိမ်မှု မရှိခြင်း စသည့်အချက်များကို ဖော်ပြထားပြီး အခွင့်အလမ်းများအဖြစ် မီဒီယာ၊ လူမှုအဖွဲ့အစည်းများ၊ အစိုးရအဖွဲ့အစည်းများနှင့် ပူးပေါင်းဆောင်ရွက်ခြင်း၊ ရွေးကောက်ပွဲဆိုင်ရာ ဥပဒေ၊ နည်းဥပဒေများ၊ ပြင်ဆင်ခြင်း ဖြည့်စွက်ခြင်း စသည့်အချက်များကို ဖော်ပြထားသည်။
ဥပဒေများ ပြင်ဆင်ဖြည့်စွက်ခြင်းနှင့် ပတ်သက်၍ ပြည်ထောင်စု ရွေးကောက်ပွဲ ကော်မရှင်က ဥပဒေများ၊ နည်းဥပဒေများကို ပြင်ဆင် ဖြည့်စွက်ရေးဆွဲပြီးပါက မူကြမ်းကို လွှတ်တော်သို့ တင်သွင်း အတည်ပြုချက် ရယူရန် ဖြစ်ကြောင်း၊ သို့သော် ထိုသို့ လွှတ်တော်မှ အတည်ပြု ပြဋ္ဌာန်းနိုင်ရေးအတွက် အချိန်ကန့်သတ်ချက်မှာ ခန့်မှန်းမရနိုင်သော အခြေအနေဖြစ်ကြောင်း၊ ၂၀၁၅ ခုနှစ်တွင် ရွေးကောက်ပွဲများ ကျင်းပရမည် ဖြစ်၍ ဥပဒေ ပြင်ဆင်ဖြည့်စွက်ရေးမှာ ၂၀၁၄ နှစ်လယ်ခန့်တွင် ပြီးစီးသင့်ကြောင်းလည်း ပြည်ထောင်စု ရွေးကောက်ပွဲကော်မရှင်၏ မဟာဗျူဟာ စီမံချက်တွင် ဖော်ပြထားသည်။
မဲစာရင်းပြုစုခြင်းနှင့် ပတ်သက်၍လည်း အဆိုပါ မဟာဗျူဟာတွင် ဖော်ပြထားပြီး မှန်ကန်တိကျသော မဲစာရင်း ရရှိရေးအတွက် ကွန်ပျူတာဖြင့် စာရင်းဇယား အချက်အလက်များ သိမ်းဆည်းသည့် စနစ်ကို အသုံးပြုနိုင်ရန် စတင်ကြိုးပမ်းလျက် ရှိကြောင်း၊ တစ်နိုင်ငံလုံး အတိုင်းအတာနှင့် ပြုစုနိုင်ရန် ကွန်ပျူတာအင်အား လူအင်အား၊ အတတ်ပညာ လိုအပ်ချက်များစွာ ရှိနေကြောင်း၊ မဲစာရင်းအများစုမှာ ကွန်ပျူတာတွင် သိမ်းဆည်းခြင်း မပြုနိုင်သေးသဖြင့် လက်ရေးဖြင့်ပင် ရှိနေကြောင်း၊ ယင်းအချက်မှာလည်း ရင်ဆိုင်ရမည့် အခက်အခဲများအနက် တစ်ခုဖြစ်ပါကြောင်းလည်း ဖော်ပြထားသည်။
လာမည့် ၂၀၁၅ ခုနှစ် ရွေးကောက်ပွဲကို လွတ်လပ်ပြီး တရားမျှတသည့် ရွေးကောက်ပွဲဖြစ်အောင် လုပ်ဆောင်သွားမည်ဟု ပြည်ထောင်စု ရွေးကောက်ပွဲ ကော်မရှင်ဥက္ကဋ္ဌ ဦးတင်အေးက အောက်တိုဘာလအတွင်း နိုင်ငံရေး ပါတီများနှင့် တွေ့ဆုံစဉ် ပြောကြားထားသည်။
နိုင်ငံရေး ပါတီများအနေဖြင့် ပြည်ထောင်စု ရွေးကောက်ပွဲ ကော်မရှင်မှ ပေးပို့ထားသည့် အဆိုပါ မဟာဗျူဟာ မူကြမ်းအပေါ် ပေးပို့လိုသည့် အကြံပြုချက်များအား ၂၀၁၃ ခုနှစ် နိုဝင်ဘာ ၈ ရက် နောက်ဆုံးထား ပေးပို့ရမည် ဖြစ်ကြောင်း သိရသည်။
အေးချမ်းမွန် Credit To >Eleven Media Group
Post a Comment