ရခိုင်အရေးအတွက် အာဆီယံနိုင်ငံခြားရေးဝန်ကြီးများ အထူးအစည်းအဝေး ကျင်းပရန် ဒေါ်အောင်ဆန်းစုကြည် စီစဉ်

ဘန်ကောက်၊ဒီဇင်ဘာ၊ ၁၂

မြန်မာနိုင်ငံ၏နိုင်ငံတော်အတိုင်အပင်ခံပုဂ္ဂိုလ်နှင့် နိုင်ငံခြားရေးဝန်ကြီးဒေါ်အောင်ဆန်းစုကြည်သည် အာဆီယံနိုင်ငံများမှ နိုင်ငံခြားရေးဝန်ကြီးများနှင့် အထူးအစည်းအဝေးတစ်ရပ်ကျင်းပရန် စီစဉ်ထားကြောင်း Nikkei Asian Review သတင်းဌာနတွင် ဖော်ပြထားသည်။

ဒီဇင်ဘာလ၊ ၁၉ ရက်နေ့တွင် ရန်ကုန်မြို့၌ကျင်းပရန်စီစဉ်ထားသည့်ယင်းအစည်းအဝေးတွင် ရခိုင်ပြည်နယ် အရေးအပေါ် နိုင်ငံတကာကစိုးရိမ်နေမှုများနှင့် ပတ်သက်ပြီး ဆွေးနွေးသွားမည်ဟု ဖော်ပြထားသည်ကိုလည်း တွေ့ရသည်။ ယခုအကြိမ်သည် ရခိုင်အရေးနှင့်ပတ်သက်ပြီးအစည်းအဝေးကျင်းပရန် အခြားအာဆီယံနိုင်ငံများကို မြန်မာနိုင်ငံက ပထမဆုံးအကြိမ်စတင်ဆင့်ခေါ်ခြင်းလည်း ဖြစ်သည်။

ထိုကဲ့သို့မြန်မာနိုင်ငံဘက်က အစည်းအဝေးတစ်ရပ်ဆင့်ခေါ်ရန် ဆုံးဖြတ်ထားသည့်အကြောင်းကို ပြီးခဲ့သည့် စနေ၊တနင်္ဂနွေနေ့က ဘာလီတွင်ကျင်းပခဲ့သည့် အာဆီယံအကြီးတန်းအရာရှိများအစည်းအဝေးတစ်ရပ်တွင် ကျန်နိုင်ငံများကို မြန်မာနိုင်ငံကအသိပေး ခဲ့ခြင်း ဖြစ်သည်။

အာဆီယံနိုင်ငံများထဲတွင် မူစလင်ဘာသာဝင်အများစုရှိသည့် မလေးရှားနှင့် အင်ဒိုနီးရှားနိုင်ငံတို့သည် မြန်မာနိုင်ငံရှိ မူစလင်ဘာသာဝင်ဘင်္ဂါလီများအရေးနျှင့် ပတ်သက်ပြီး အထူးစိုးရိမ်ကြောင်း
ထုတ်ဖော်ပြောကြားထားသည့်နိုင်ငံများ ဖြစ်သည်။

ဒီဇင်ဘာလ၊ ၆ ရက်နေ့ကလည်း ဒေါ်အောင်ဆန်းစုကြည်၏ ဖိတ်ခေါ်မှုအရ အင်ဒိုနီးရှားနိုင်ငံခြားရေးဝန်ကြီး ရတ်နိုမာဆူဒီသည် နေပြည်တော်သို့လာရောက်ပြီး ရခိုင်ပြည်နယ်အခြေအနေနှင့်ပတ်သက်၍ အင်ဒိုနီးရှားနိုင်ငံ၏ စိုးရိမ်မှုကို ထုတ်ဖော်ပြောကြားထားခဲ့ကြောင်း Nikkei Asian Review ကဖော်ပြထားသည်။

http://thevoicemyanmar.com/news/4379-politic