ပုဒ်မ ၁၇ (၁) ဖြင့် တရားစွဲ ခံထားရသည့် SNLD တာဝန်ခံ ပြန်လည် လွတ်မြောက်

ကျိုင်းတုံ၊ ACM Re-Post 1-6-2014

ရှမ်းပြည် ပြန်လည်ထူထောင်ရေးကောင်စီ (RCSS)၊ ရှမ်းပြည်နယ်တောင်ပိုင်း တပ်မတော် (SSA) နှင့် ဆက်သွယ်သည်ဟု ဆိုကာ မတရားအသင်း ဆက်သွယ်မှု အက်ဥပဒေ ပုဒ်မ ၁၇ (၁) ဖြင့် တရားစွဲ ခံထားရသည့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) နမ့်လင်းမိုင်ကျေးရွာ တာဝန်ခံ စိုင်းအိုက်ကျိန်း (ခ) အိုက်ကျိမ်းကို မေလ၂၉ ရက်နေ့ ညနေပိုင်းက ပြန်လွှတ်ပေးခဲ့ကြောင်း ကျိုင်းတုံမြို့နယ် ရဲတပ်ဖွဲ့မှူးနှင့် SNLD ပါတီ ဗဟိုအလုပ်အမှုဆောင် ကော်မတီဝင်တို့က ပြောကြားသည်။

စိုင်းအိုက်ကျိန်း (ခ) အိုက်ကျိမ်းကို ကျိုင်းတုံမြို့နယ် ရဲစခန်းမှူးက မေလ ၂၂ ရက်နေ့တွင် ပုဒ်မ ၁၇ (၁) ဖြင့် တရားစွဲဆိုခဲ့ခြင်း ဖြစ်ရာ ယင်းမြို့နယ် ရဲတပ်ဖွဲ့စခန်းမှူးကပင် အမှုပြန်လည် ရုပ်သိမ်းပေးခဲ့ခြင်းကြောင့် အပြီးအပြတ် ပြန်လည်လွတ်မြောက်ခဲ့ခြင်း ဖြစ်ကြောင်း ကျိုင်းတုံမြို့နယ် ရဲတပ်ဖွဲ့မှူး ခင်မောင်သိန်းက ပြောဆိုသည်။

“တရားမစွဲတင်မီ ကျေအေးလွှာ တင်ပေးလိုက်လို့ လွတ်မြောက်လာတာပါ။ ကျေအေးလွှာ တင်ပေးဖို့လည်း ညွှန်ကြားထားတာ ရှိပါတယ်။ နိုင်ငံတော်သမ္မတကြီးနဲ့ SNLD ဘက်က တာဝန်ရှိတဲ့သူတွေ ညှိနှိုင်းကြတယ်လို့ သိရတယ်” ဟု ၎င်းကဆိုသည်။

အဆိုပါ စိုင်းအိုက်ကျိန်း (ခ) အိုက်ကျိမ်း ဖမ်းဆီးခံရခြင်းနှင့် ပတ်သက်၍ SNLD ပါတီ ဥက္ကဋ္ဌ ဦးခွန်ထွန်းဦး အပါအဝင် ငြိမ်းချမ်းရေး ဖော်ဆောင်ရေး ကော်မတီဝင်များနှင့် နိုင်ငံတော်သမ္မတ ဦးသိန်းစိန်တို့ တွေ့ဆုံညှိနှိုင်းမှုအရ ယင်းသို့ ပြန်လည်လွတ်မြောက်လာခြင်း ဖြစ်ကြောင်း SNLD ဗဟိုအလုပ်အမှုဆောင် ကော်မတီဝင် ရှမ်းပြည်နယ် (အရှေ့ပိုင်း) ဥက္ကဋ္ဌ ဦးစိုင်းလုံက ပြောကြားသည်။

“စိုင်းအိုက်ကျိန်း ပြန်လွတ်လာပေမယ့် သူ့လိုပဲ ပုဒ်မ ၁၇ (၁) နဲ့ တစ်ချိန်တည်း တရားစွဲဆို ခံထားရတဲ့ ရှမ်းမြောက် SNLD က စိုင်းအေးလွင်နဲ့ စိုင်းအောင်လှိုင်တို့ နှစ်ဦးကိုတော့ ဒီနေ့ (မေ ၃၁ ရက်နေ့) အထိ လွှတ်မပေးသေးဘူး။ အမြန်ဆုံး ပြန်လွှတ်ပေးလိမ့်မယ်လို့ မျှော်လင့်ပါတယ်” ဟု ၎င်းကဆိုသည်။

ကျိုင်းတုံမြို့နယ် နမ့်လင်းမိုင်ကျေးရွာ၏ SNLD တာဝန်ခံ စိုင်းအိုက်ကျိန်း (ခ) အိုက်ကျိန်းကို မေလ ၅ ရက်နေ့ ည ၈ နာရီခန့်တွင် အမှတ် (၂၄၅) ခြေလျင်တပ်ရင်းက လက်နက်ကိုင်ဆောင်ထားသည့် တပ်မတော်သား ၃၀ ခန့်က RCSS/SSA နှင့် ဆက်သွယ်သည်ဟု ဆိုကာ ဖမ်းဆီးခဲ့ပြီး သုံးရက်ကြာ စစ်ဆေးခဲ့ပြီးနောက် ကျိုင်းတုံမြို့နယ် ရဲစခန်းတွင် ယမန်ယူ ချုပ်နှောင်ကာ မေလ ၂၂ ရက်နေ့တွင် ပုဒ်မ ၁၇ (၁) ဖြင့် တရားစွဲဆိုခဲ့ခြင်း ဖြစ်ကြောင်းနှင့် ဇွန်လ ၂ ရက်နေ့တွင် တရားရုံး၌ ရုံးတင် စစ်ဆေးရမည် ဖြစ်သော်လည်း မေလ ၂၉ ရက်နေ့တွင် အမှုပြန်လည် ရုပ်သိမ်းကာ အပြီးသတ် လွှတ်ပေးခဲ့ခြင်း ဖြစ်ကြောင်း ဦးစိုင်းလုံက ထပ်လောင်းရှင်းပြသည်။

“စပြီး အဖမ်းခံရတဲ့နေ့ကနေ သုံးရက်ကြာတဲ့အထိ တပ်မတော်သားတွေက ရိုက်နှက် စစ်ဆေးလို့ ဘယ်ဘက်မျက်ခုံး ကွဲသွားတယ်။ ဗိုက်ကိုလည်း သေနတ်ဒင်တွေနဲ့ အထုခံရတယ်။ SSA က ပေးထားတဲ့ သေနတ်ရှိတယ်လို့ ပြောပြီး ထုတ်ပေးဖို့ အတင်းအကျပ် ပြောတယ်။ ကျွန်တော်က ရိုးရိုးအရပ်သား ဘယ်လိုလုပ် သေနတ်ကိုင်နိုင်မှာလဲ။ အခုလို လွတ်လာပြီ ဆိုတော့ ပါတီရဲ့ အလုပ်တွေကို အရင်ထက် ပိုကြိုးစားပြီး လုပ်မယ်” ဟု ပြန်လည် လွတ်မြောက်လာသည့် စိုင်းအိုက်ကျိန်း (ခ) အိုက်ကျိမ်းက ပြောကြားသည်။

RCSS/SSA သည် နိုင်ငံတော်နှင့် အပစ်အခတ် ရပ်စဲထားသည့် တိုင်းရင်းသား လက်နက်ကိုင် အဖွဲ့အစည်း တစ်ခုဖြစ်ပြီး ကျိုင်းတုံမြို့ အပါအဝင် ရှမ်းပြည်နယ်အတွင်းရှိ အခြားမြို့ကြီးများတွင်လည်း ဆက်ဆံရေးရုံးများ ဖွင့်လှစ်ထားသည်။

Aye Chan Mon Credit To: The Voice Weekly
မိတ်ဆွေ-ဒီလင့် ၂ ခုကို Click နှိပ်ရုံဖြင့်သတင်းအစုံကိုဖတ်နိုင်ပါသည်။
https://www.facebook.com/excellencemedia
http://www.ayechanmon-news1.com/