ပီမှ အာ ကြစေချင်သည် Aye Chan Mon Aye Chan Mon

တကယ်တော့သည် ဇာတ်လမ်း၏ အစမှာ ၂၀၁၂ ဖေဖော်ဝါရီလ ၁၅ ရက်နေ့ ဖြစ်သည်။ အမေရိကားသို့ ကျွန်တော် ခေတ္တရောက်နေချိန်မှာ ဆန်ဖရန်စစ်စကိုမြို့ အနီးရှိ စတန်းဖို့ဒ်တက္ကသိုလ်သို့ လည်ခွင့်ကြုံခဲ့သည်။ ကျွန်တော်ထောင်ထဲမှာ ရှိနေစဉ်က လယ်ရီဒိုင်းမွန်း ရေးသားသည့် ဒီမိုကရေစီ စိတ်ထားဆိုသော စာအုပ်ကို ဖတ်ဖူးသည်။ နှစ်ခြိုက်ဖူး၏။ သည်အကြောင်းကို အမေရိကန်နိုင်ငံ ဝါရှင်တန်မှာ ရှိနေစဉ် NED မှာ ပြုလုပ်သည့် ဟောပြောပွဲ၌ ထည့်ပြောမိလိုက်သည်။ ဖြစ်ချင်တော့ ပရော်ဖက်ဆာ လယ်ရီဒိုင်းမွန်းက NED မှ သုံးလတစ်ကြိမ် ထုတ်ဝေနေသည့် ဒီမိုကရေစီဂျာနယ်၏ ခေါင်းကိုင်ဖခင် ဖြစ်နေလေသည်။ သည်မှာတင် ဆရာလယ်ရီဒိုင်းမွန်းနှင့် ဆုံတွေ့ဖို့ အကြောင်းဖန်လာတော့၏။ NED မှာ အမှုထမ်းခဲ့သော ကိုမင်းဇင်က ဆရာလယ်ရီဒိုင်းမွန်း၏ ကျောင်းသား။ ကိုမင်းဇင်မှတစ်ဆင့် လယ်ရီဒိုင်းမွန်းက သူ့ကျောင်းတော်ကြီးဆီသို့ ကျွန်တော့်ကို ဖိတ်ခေါ်လိုက်လေသည်။

ကျွန်တော်ရောက်သွားတော့ ဆရာလယ်ရီဒိုင်းမွန်းနှင့် စကားတွေ အများကြီး ပြောခဲ့သလို သူ့ဆီကတစ်ဆင့် တခြားသော မြန်မာ့အရေးကို စိတ်ဝင်စားသည့် နိုင်ငံရေးသိပ္ပံဆရာနှင့် အဆက်အသွယ် ရခဲ့သည်။ ဆရာလယ်ရီဒိုင်းမွန်းက မြန်မာပြည်အကြောင်း ကောင်းကောင်းသိသည်။ တော်တော်လည်း လေ့လာထားသည်။ စေ့စေ့စပ်စပ် ဆွေးနွေးသည်။ နှိုက်နှိုက်ချွတ်ချွတ် မေးတတ်သည်။ သို့ဖြင့် ကျွန်တော်တို့ စကားဝိုင်းက အချိန်တော်တော်ယူခဲ့၏။ အပြန်မှာ မြန်မာပြည် လာလည်ဖို့၊ မြန်မာပြည်မှာ ဆရာလယ်ရီဒိုင်းမွန်း အနေနှင့် ဟောပြောပို့ချပေးဖို့ ကျွန်တော် ဖိတ်ကြားမိခဲ့သည်။

တကယ်တော့ ဒါသည်ပင် စိတ်ကူးယဉ် နည်းနည်းဆန်နေသည်။ သူတို့လို မအားလပ်သော၊ အချိန်နှင့် ငွေကြေးကို ထပ်တူချထားသော နာမည်ကျော် ပရော်ဖက်ဆာ တစ်ယောက်အဖို့ မြန်မာပြည်ကို အလည်အပတ် လာဖို့ဆိုတာ မဖြစ်နိုင်ပါ။ သို့သော် ဒါသည် တကယ်ဖြစ်ခဲ့၏။ နောက်လေးလ အကြာမှာ ဆရာလယ်ရီဒိုင်းမွန်း မြန်မာပြည်သို့ တစ်ပတ်ကြာ လာရောက်လည်ပတ်မည်ဟု သိရသည်။ သူ့ဆီက အီးမေးလ် ရချိန်မှာ ကျွန်တော် ဥရောပသို့ ရောက်နေပြီ။ ရန်ကုန်ပြန်လို့ကလည်း မဖြစ်နိုင်။ ခရီးစဉ်အရ ဂျာမနီသို့ လှည့်ရဦးမည်။ သို့သော် သူမပြန်ခင် တစ်ရက်အလိုမှာ ရန်ကုန် ပြန်ရောက်အောင် ပြန်ခဲ့ပါမည်ဟု သူ့ကို ကတိပေးခဲ့သလို ကျွန်တော်တို့၏ HOME (House of Media & Entertainment) မှာ နိုင်ငံရေးနှင့် ပတ်သက်ပြီး တစ်ခုခု ဟောပြောပေးဖို့ ပန်ကြားလိုက်ရသည်။

ဆရာလယ်ရီဒိုင်းမွန်းက အပြောနှင့်လက်တွေ့ ထပ်တူကျသူပင်။ ကျွန်တော် မရှိသော်လည်း ကိုဇော်သက်ထွေး၏ စီမံမှုဖြင့် နှစ်ရက်တိုင်တိုင် ကျွန်တော်တို့ HOME ဒီမိုကရေစီနည်းကျကျ အသွင်ကူးပြောင်း ဖြစ်စဉ်ကို ဟောပြောပို့ချခဲ့သည်။ လူငယ်ကျောင်းသား နိုင်ငံရေးသမားလေးတွေက စလို့ စာရေးဆရာ နိုင်ငံရေးသမားတွေထိ လာရောက် နာယူကြသည်။ သူ၏ ဟောပြောချက်အချို့ကို ကောက်နုတ်ပြီး လွတ်မြောက်နည်းပညာ ဟူသည့် စာအုပ်လေးတစ်အုပ် ကျွန်တော်တို့ ထုတ်ခဲ့ဖူးသည်။ ဆရာလယ်ရီဒိုင်းမွန်း မပြန်ခင် ကျွန်တော် ရန်ကုန်ပြန်ရောက်ခဲ့၏။ သူနှင့်အတူ နိုင်ငံရေးပါတီ အချို့မှ ခေါင်းဆောင်များနှင့် လိုက်တွေ့ခဲ့ရသလို နိုင်ငံရေး အပြောင်းအလဲအတွက် ထဲထဲဝင်ဝင် ပါဝင် လုပ်ဆောင်နေသူများနှင့်ပါ တွေ့ဆုံခဲ့ရသည်။ သည်မှာတင် ကျွန်တော် စတင် ပြောဆိုရတော့မည့် ပီအာရ် ဆိုတာကြီး ပေါက်ဖွား ရှင်သန်လာပါတော့သည်။

ဆရာလယ်ရီဒိုင်းမွန်းက ကြားဖြတ်ရွေးကောက်ပွဲ ပြီးချိန်တွင် ရောက်လာခဲ့သူ ဖြစ်သဖြင့် အနိုင်အရှုံး အဖြေကို ရိပ်စားမိသူလည်း ဖြစ်၏။ သို့သော် ၂၀၁၅ မှာ ရွေးကောက်ပွဲ ကျင်းပခဲ့လျှင် ကြံ့ခိုင်ရေးပါတီ တစ်ပါတီတည်း (သို့မဟုတ်) NLD တစ်ပါတီတည်းက အများဆုံး အနိုင်ရခဲ့သော် ဆိုသည့် အခြေအနေအပေါ် မူတည်ထားပြီး ဆွေးနွေးသွားခဲ့သည်။ သူနှင့် တွေ့ဆုံ ဆွေးနွေးနေသူများထဲမှာ ကြံ့ခိုင်ရေးရော NLD ပါ မပါသည့်အတွက် လွတ်လွတ်လပ်လပ် ပြောဆိုခြင်းလည်း ဖြစ်၏။ သူက စဉ်းစားစရာတွေကို တင်ပြခြင်း အကြံပေးခဲ့ခြင်းသာ ဖြစ်ပြီး (ဒါကိုလုပ်မှ ဖြစ်မယ်) ဟု တစ်ချက်လွှတ် အမိန့်တော်ထုတ်ခဲ့ခြင်း မဟုတ်ချေ။

ယခု ကျွန်တော်တို့ နိုင်ငံက ကျင့်သုံးနေသည့် ရွေးကောက်ပွဲစနစ်က First Past the Post (ခ) မဲအသာရသူက နိုင်သည့်စနစ် ဖြစ်သည်။ ဖဲသမားစကားနှင့် ဆိုရသော် အတိုက်မရှိ၊ နိုင်သူ စားစတမ်းပင် ဖြစ်သည်။ ဒါကို တချို့က သိပ်မကြိုက်ချင်။ တစ်မဲနိုင်လည်း အကုန်နိုင် တစ်ထောင်မဲ နိုင်လည်း အကုန်နိုင်ဆိုတာ မမျှတဖူးလို့ ထင်လာကြ၏။ ဝေစားမျှစား လုပ်ချင်သည်။ သည်တော့ PR (ခ) Proportional Representation ဟူသည့် ဝေပုံကျစနစ်ကို လေ့လာစမ်းသပ်ကြည့်ဖို့ ဆရာလယ်ရီဒိုင်းမွန်းက အကြံပြုသည်။

၂၀၁၂ ခုနှစ် အောက်တိုဘာလထုတ် ဒီမိုကရေစီ ဂျာနယ်ထဲမှာလည်း သူက PR စနစ်ကို စဉ်းစားသင့်ကြောင်း ထည့်ရေးခဲ့ပါသေးသည်။ အမှန်ကတော့ PR စနစ်ကို မြန်မာပြည်မှာ သုံးသင့်သည်ဟု သူက အကြံပြုခဲ့တာ မဟုတ်။ အစိုးရနှင့် အတိုက်အခံ နိုင်ငံရေးပါတီ (သို့) အဖွဲ့အစည်းတို့ အကြားမှာ နိုင်ငံရေး ပဋိညာဉ်တစ်ရပ် ပီပီပြင်ပြင် ရှိသင့်သည်ဟု အကြံပြုခြင်းသာ။ ထိုပဋိညာဉ် ရအောင်လည်း အတိုက်အခံတို့ဘက်မှ အားထုတ်သင့်သည့် အချက်များကို တင်ပြဆွေးနွေးခြင်းသာ။ ထိုဆောင်းပါးကို သေသေချာချာ ဖတ်ရှုခဲ့သော ဆရာလယ်ရီဒိုင်းမွန်းက ၂၀၁၅ ရွေးကောက်ပွဲ မတိုင်မီ ဖွဲ့စည်းပုံ အခြေခံဥပဒေကို ပြင်ဆင်ရေးသည် အလွန်တရာ အရေးကြီးကြောင်း အကြံပြုလိုရင်းသာ ဖြစ်၏။

အကယ်၍သာ ဖွဲ့စည်းပုံ အခြေခံဥပဒေ မပြင်နိုင်ခဲ့လျှင် ကျွန်တော်တို့ တိုင်းပြည်မှာ နိုင်ငံရေး အကျပ်အတည်း ဆိုက်နိုင်သည်။ သည်လို အကျပ်အတည်း ဆိုက်ခဲ့သော် ရှောင်ရှားနိုင်စေဖို့ PR စနစ်ကို စဉ်းစားထားသင့်ကြောင်း အဆိုပြုသက်သက်သာ။ (ကျွန်တော် မမှားဘူးဟု ဆိုလျှင် ဆရာကျော်ဝင်းသည် ဆောင်းပါးကို မြန်မာဘာသာသို့ ပြန်ဆိုရေးသားပြီးပြီ ထင်ပါသည်။ ပြန်လည် ဖတ်ရှုနိုင်ပါ၏)

အခုတော့ လွှတ်တော်ထဲမှာ သည်ဝေပုံကျစနစ်ကို ဆွေးနွေးဖို့အထိ နေရာယူလာခဲ့ချေပြီ။ ပထမတစ်ခုနှင့်တောင် အသားမကျသေးသည့် ကျွန်တော်တို့နိုင်ငံကို တောင်စမ်းမြောက်စမ်း မလုပ်စေချင်။ ကျွန်တော်တို့ ငယ်ငယ်က ခဏခဏ ပြောင်းပြောင်းပြီး စမ်းသပ်ခဲ့သည့် ပညာရေးစနစ်ကြောင့် ကျွန်တော်တို့ တိုင်းပြည်၏ ပညာရေး ဘယ်လောက် နိမ့်ကျခဲ့ပြီ ဆိုတာကို သတိတရား ရကြစေချင်သည်။ ဘာမှ နေသားမကျသေးသော တိုင်းပြည်ကို ဓာတ်ခွဲခန်းထဲ ထည့်ပြီး စမ်းသပ်နေဖို့ မသင့်တော်ပါ။

တကယ်တမ်း ရွေးကောက်ပွဲစနစ်အကြောင်း ပြောကြစတမ်းဟေ့ ဆိုလျှင် ကျွန်တော်တို့ ပြောပါမည်။ ကျွန်တော်တို့ ပြည်သူတွေ လေ့လာနိုင်အောင် ကြိုးစားပြီး တင်ပြချင်ပါသည်။ သူများပီတိုင်း ကိုယ်မပီပဲ အာချင်သူများကိုလည်း စဉ်းစားကြပါဦးဟု ဆိုချင်သည်။

ရွေးကောက်ပွဲမှာ ကိုယ့်ပါတီက ရသည့် ထောက်ခံမဲ ရာခိုင်နှုန်းအလိုက် လွှတ်တော်ထဲမှာ ထိုင်ခုံအရေအတွက် ခွဲတမ်းရသည့် စနစ်ကို ပီအာရ်ဟု ဆိုရပေမည်။ ဆိုကြပါစို့။ လာမည့် ၂၀၁၅ ရွေးကောက်ပွဲမှာ တူမောရိုး ပါတီက ထောက်ခံမဲ ၂၅ ရာခိုင်နှုန်း ရခဲ့သော် လွှတ်တော်ထဲမှာ ရှိသည့် ကိုယ်စားလှယ် အရေအတွက်၏ လေးပုံတစ်ပုံ (၂၅ ရာခိုင်နှုန်း) ကို ရမည် ဖြစ်သည်။ လွှတ်တော်ကိုယ်စားလှယ် အရေအတွက် ၃၀၀ ဆိုလျှင် တူမောရိုးပါတီက ကိုယ်စားလှယ် ၇၅ နေရာ ရပေမည်။

သည်နေရာမှာ မေးစရာ ရှိလာသည်။ တူမောရိုးပါတီ အနေနှင့် တာမွေမြို့နယ်မှာ ဝင်ပြိုင်ပြိုင်၊ မင်းဘူးမြို့နယ်မှာ ဝင်ပြိုင်ပြိုင်၊ အနိုင်အရှုံး အရေးမပါတော့ဘူးလား။ မဲအရေအတွက်ကိုသာ အဓိကထားသဖြင့် နိုင်တာ ရှုံးတာ ဘာမှ မလိုတော့ပါဘူး။ ဒါဆို မဲပေးရတဲ့ ပြည်သူတွေက မဲအနိုင်အရှုံးစာရင်း နားထောင်ပြီး ရင်မခုန်ကြရတော့။ မပျော်ကြရတော့။ ဘယ်သူတွေနိုင်ပြီး လွှတ်တော်ထဲ ဘယ်သူတွေ ဘယ်ရောက်ကုန်မယ် ဆိုတာတောင် သိရမှာ မဟုတ်တော့ချေ။ ကိုယ့်မြို့နယ်၏ ကိုယ်စားလှယ်က ဘယ်သူဘယ်ဝါတောင် သိရဖို့ မလွယ်တော့။

သည်တော့ ပီအာရ်စနစ်မှာ ဘယ်သူ့ကို မဲပေးရမည်နည်း။ ဒါမေးစရာ မေးခွန်းတစ်ခု ဖြစ်သည်။ ပါတီကို ကြည့်ပြီး မဲပေးရလောက်အောင် ကျွန်တော်တို့ တိုင်းပြည်က ပါတီတွေ လောက်လောက်လားလား ဖြစ်ပြီလား၊ ပြည်သူတွေ မဲပေးတဲ့ အလုပ်နှင့် ကျင့်သားရပြီလားဟု ဦးဆုံး မေးရတော့မည်။

ပီအာရ်စနစ်မှာ ပါတီက လူစာရင်းကို ကိုင်ထားသည်။ ကျွန်တော်တို့ ပြည်သူတွေက သည်စာရင်းကို ဘာမှ ပြောင်းပိုင်ခွင့် မရှိ။ ပါတီ ခေါင်းဆောင်တွေ လက်ထဲမှာသာ အာဏာရှိ၏။ ကိုယ်စားလှယ်တွေ လက်ထဲမှာလည်း ဘာအခွင့်အရေးမှ မရှိ။ ပါတီ ခေါင်းဆောင်တွေက မကြိုက်ရင် မကြိုက်သလို ပြောင်းခွင့် ရှိနေသည်။ သည်မှာတင် စာရင်းနဲ့ ရွေးမှာလား၊ နယ်မြေ အပိုင်းအခြားနဲ့ ရွေးမှာလား၊ တစ်နိုင်ငံလုံး အတိုင်းအတာနဲ့ ရွေးမှာလား ဆိုတာတွေကိုပါ ထည့်သွင်း စဉ်းစားရတော့သည်။ မဲပေးမည့် ပြည်သူတွေအတွက် စိတ်ရှုပ်စရာတွေ ရှိပါသေးသည်။ ပီအာရ် ဆိုတာနှင့် ပြီးမသွားသေးပါ။

၁။ Cumulation ခေါ် ကိုယ်ကြိုက်လျှင် သုံးမဲအထိ ပေးခွင့်ရှိသော စနစ်မျိုးလည်း ရှိနေပြန်ပါသည်။
၂။ Cross Voting ခေါ် တစ်ခါမဲပေးလျှင် ကြိုက်ရာပါတီ သုံးခုလောက်ကို မဲပေးခွင့် ရနိုင်တာမျိုးလည်း ရှိနေပြန်ပါသည်။
မဲတစ်ခါပေးလျှင် ကိုယ်ကြိုက်တာ ကိုယ်တစ်ယောက်တည်း ရွေးပေးနေရသည့် စနစ်မှာတောင် တော်တော်ချာလပတ်လည်နေသည့် ကျွန်တော်တို့ တိုင်းပြည်မှာ ပြည်သူကို စိတ်ဒုက္ခရောက်အောင် မလုပ်ကြစေချင်။ မဲပေးရာမှာ စိတ်ပျက်စိတ်ညစ်ပြီး မဲရုံကို ဝေါနဲ့ပင့်တာတောင် ပြည်သူတွေ လာချင်စိတ် ပျောက်အောင် မလုပ်သင့်ပါ။ ဒါ ကျွန်တော် အမြွက်ပဲ ပြောတာဖြစ်သည်။ ပီအာရ်စနစ် အောက်မှာ
၃။ Ley de lemas (ခ) သမ္မတနှင့် ကိုယ်စားလှယ်ကို တစ်ပါတည်း ရွေးပေးရသည့် စနစ်လည်း ရှိ၏။
၎။ STV (Single Transferable) မဲကို ပထမ ဦးစားပေး၊ ဒုတိယ ဦးစားပေးနှင့် ရွေးပေးရတာမျိုးလည်း ရှိ၏။
၅။ SV (Supplementry Vote) ခေါ် အပိုဆောင်းပေးရတဲ့ မဲပေးစနစ် ဆိုတာလည်း ရှိသေးသည်။ ကိုယ်ကြိုက်သည့် ပါတီကို ရွေးပေးရသလို တခြားပါတီတွေထဲက နောက်ထပ် တစ်ပါတီကိုပါ အပို (အဆစ်) ရွေးပေးခဲ့ရတာမျိုးပင်။

သည်လောက် ယောက်ယက်ခတ်နေသည့် စနစ်မျိုးကိုမှ တိုင်းပြည်မှာ ကျင့်သုံးတာက ဘာကြောင့်လဲဟု မေးရမည်။ သည်စနစ်ကို လွှတ်တော်က လက်ခံ ဆွေးနွေးတာကိုတော့ အပြစ်မတင်လိုသော်လည်း မရောင်ရာ ဆီမလူးကြစေချင်ပါ။

ကျွန်တော်တို့ တိုင်းပြည်မှာ အခုအချိန် တကယ်တမ်း အရေးကြီးနေတာက ဖွဲ့စည်းပုံ အခြေခံဥပဒေ ပြင်ဆင်ရေးသာ ဖြစ်သည်။ သည်လို အကျပ်အတည်းမျိုးထဲကတောင် မထွက်နိုင်သေးချိန်မှာ နောက်ထပ် သပွတ်အူတစ်ခုကို ချမပြသင့်သေးပါ။ မြန်မာပြည်သူပြည်သားတွေ ခင်မျာ စားဝတ်နေရေးနှင့် ထွေးလုံး ရစ်ပတ်ဖြစ်နေချိန်မှာ စိတ်ပျက်အောင် စိတ်ရှုပ်အောင် စိတ်အားငယ်အောင် စိတ်ဓာတ်ကျအောင် နိုင်ငံရေးကို စိတ်ကုန်ခန်းသွားအောင် နိုင်ငံရေးသမားတွေ လုပ်နေကြမှာလားဟု တည့်တည့်မေးချင်သည်။

တကယ်တော့ PR စနစ်ကို အသုံးမဝင်ဘူး၊ မကောင်းဘူးဟု ကျွန်တော်ပြောနေခြင်း မဟုတ်၊ လတ်တလော ကျွန်တော်တို့ နိုင်ငံနှင့် မသင့်တော်သေးပါဟု ဆိုလိုခြင်းသာ ဖြစ်သည်။ လက်ရှိ ကျင့်သုံးနေသော First Past the Post ခေါ် သာသူ အကုန်စားစနစ်က တစ်ပါတီတည်းကို လွှတ်တော်မှာ အားကောင်းစေပြီး အာဏာရှင်တွေ ဖြစ်လာစေသည်ဟူသော ရွှေဉာဏ်ရှင် လွှတ်တော်ကိုယ်စားလှယ် မမကြီး၏ စကားကို TV မှာ ကြားလိုက်ရတော့ အံ့အားသင့်မိသည်။ ပြိုင်ပွဲ ဆိုတာကတော့ ရှုံးမှာကြောက်လျှင် စောစောကပင် မဝင်ကြတာ ကောင်းပါသည်။ မဲရုံနှင့် ပြည်သူ ကျင့်သားရသွားအောင်တော့ စောင့်စေချင်ပါသည်။

လမစေ့သော ကလေးအတွက် အန္တရာယ် ရှိပါသည်။ လမစေ့တာကိုမှ ဇွတ်အတင်း မွေးချင်နေပါက ကိုယ့်ဘာသာပဲ ဗိုက်ကြီးကြပါဟု ပြောလိုက်ချင်ပါတော့သည်။

ဇာဂနာ

Aye Chan Mon Credit To:The Voice Weekly
http://www.ayechanmon-news1.com/