ရန်ကုန်၊ နိုဝင်ဘာ ၂၉
ခွင့်ပြုချက်မရဘဲ စီတန်းလှည့်လည် ခဲ့သည်ဟုဆိုကာ ပုဒ်မ ၁၈ ဖြင့် တရားစွဲဆို ခံထားသည့် ရွှေပြည်သာမြို့နယ် ဝါးတရာ စက်မှုဇုန်ရှိ တော်ဝင်မြန်မာ သစ်အချောထည် လုပ်သား ခုနစ်ဦးအနက် ခြောက်ဦးကို နိုဝင်ဘာလ ၂၉ ရက်နေ့တွင် စမ်းချောင်းမြို့နယ် တရားရုံးက ထောင်ဒဏ်တစ်လ သို့မဟုတ် ငွေဒဏ် ကျပ်တစ်သောင်းစီ ပြစ်ဒဏ် ချမှတ်လိုက်ကြောင်း ပြစ်ဒဏ်ချခံရသည့် လုပ်သားတစ်ဦးဖြစ်သူ ဦးနေလင်းဦးက ပြောကြားသည်။
အဆိုပါ ငွေဒဏ် ကျပ်တစ်သောင်း ပြစ်ဒဏ်ကို မကျခံပါက ထောင်ဒဏ် တစ်လ ပြစ်ဒဏ်ကို ကျခံရန် အမိန့်ချမှတ်ခဲ့ခြင်း ဖြစ်ပြီး လုပ်သားများ အနေနှင့် ငွေဒဏ် ကျပ်တစ်သောင်းကို ပေးဆောင်ခဲ့ကြောင်း၊ တရားစွဲခံခဲ့ရသူ ခုနစ်ဦးအနက် ကျန်တစ်ဦးမှာ တရားရုံး မတက်သဖြင့် တရားခံပြေးအဖြစ် သတ်မှတ်ခံထားရကြောင်း ၎င်းကဆိုသည်။
လုပ်သားများကို ခွဲခြားဆက်ဆံခြင်း၊ အလုပ်ပြောင်းရွှေ့ခြင်း မပြုလုပ်ရန် အပါအဝင် လုပ်သား အခွင့်အရေးများအတွက် တော်ဝင် မိသားစု ကုမ္ပဏီပိုင်ရှင် ဦးကိုကိုထွေးနှင့် တိုက်ရိုက် တွေ့ဆုံရန် ၂၀၁၂ ခုနှစ် အောက်တိုဘာလ ၈ ရက်နေ့က လုပ်သား ၄၀၀ ခန့် လာရောက်ခဲ့ကြောင်း၊ ယင်းအနက် ဦးဆောင်သူ ခုနစ်ဦးကို စမ်းချောင်းမြို့နယ် ရဲတပ်ဖွဲ့မှူးက ပုဒ်မ ၁၈ ဖြင့် တရားစွဲဆိုခဲ့ပြီး တစ်နှစ်ကျော် အကြာတွင် ယင်းသို့ ပြစ်ဒဏ် ချမှတ်ခဲ့ခြင်း ဖြစ်သည်။
တော်ဝင် မိသားစု ကုမ္ပဏီသို့ လာရောက်မှုဖြင့် တရားစွဲဆို ခံထားရသူ လုပ်သား ခုနစ်ဦးတွင် အမျိုးသားလေးဦးနှင့် အမျိုးသမီးသုံးဦး ပါဝင်သည်။
တော်ဝင်မြန်မာ သစ်အချောထည် လုပ်သားများကို ပုဒ်မ ၁၈ ဖြင့် အင်းစိန်မြို့နယ်၊ ရွှေပြည်သာ မြို့နယ်နှင့် မရမ်းကုန်း မြို့နယ် တရားရုံးတို့ကလည်း လုပ်သား တစ်ဦးလျှင် ဒဏ်ငွေ တစ်သောင်းစီ ပြစ်ဒဏ်များ အသီးသီး ချမှတ်ပြီး ဖြစ်ကြောင်း ပြစ်ဒဏ် ချခံခဲ့ရသည့် အဆိုပါ စက်ရုံလုပ်သားများထံမှ သိရှိရသည်။
အေးချမ်းမွန် Credit To >The Voice Weekly < Thankhttps://www.facebook.com/excellencemedia
Post a Comment