ဘင်္ဂါလီ ကိုးသိန်းကျော် သန်းခေါင်စာရင်းကောက်ရန် ကျန်နေသေး

ဟိန်းကိုစိုး| ကြာသာပတေးနေ့၊ မေလ ၈ ရက် ၂၀၁၄ ခုနှစ်

ရခိုင်ပြည်နယ်တွင်း သန်းခေါင်စာရင်းကောက်ရန် ထပ်တိုးထားသည့်ကာလ တစ်လသာကျန်တော့သော်လည်း ကျန်ရှိ ဘင်္ဂါလီဦးရေ ၁၀ သိန်းကျော်တွင် ကိုးသိန်းကျော် ကောက်ရန်ကျန်နေသေးသည်ဟု မေလ ၇ ရက်က ရန်ကုန်တိုင်းဒေသကြီးအစိုးရအဖွဲ့ရုံးတွင် ပြုလုပ်သည့် သတင်းစာရှင်းလင်းပွဲ၌ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ၀န်ကြီး ဦးခင်ရီက ပြောသည်။

မတ်လ ၃၀ ရက်မှ ဧပြီ ၁၀ ရက်အတွင်း ပြည်လုံးကျွတ်ကောက်ခံခဲ့သည့် သန်းခေါင်စာရင်းတွင် ရခိုင်ပြည် နယ်နှင့် ကချင်ပြည်နယ်မှ မပါဝင်ခဲ့သူများအတွက် ထပ်မံကောက်ယူရန် ဧပြီ ၁၁ ရက်မှ စတင်၍ ရက်သတ္တ ပတ် ရှစ်ပတ် (နှစ်လ)အထိ တိုးမြှင့်ထားသည်။

“ကျွန်တော် ထပ်တိုးကာလအတွင်း ကျန်နေတဲ့ ဘင်္ဂါလီတွေကို အကောက်ခံဖို့ ညှိနှိုင်းပါဦးမယ်။ သန်ဘက် ခါလည်း ရခိုင်ကိုသွားပြီး အဲဒီကိစ္စကိုလည်း ထပ်လုပ်ပါဦးမယ်။ မေလနောက်ဆုံးရက်ထိ ကြိုးစားသွား မယ်”ဟု ဦးခင်ရီက ဆိုသည်။

လက်ရှိရခိုင်ပြည်နယ်အတွင်း စုစုပေါင်း ဘင်္ဂါလီဦးရေ ၁ ဒသမ ၀၅ သန်း (ဆယ်သိန်းငါးထောင်)ထိ ရှိနေ သည်ဟု ၂၀၁၂ ခုနှစ်အတွင်း ပြည်သူ့အင်အားဦးစီးဌာန၏ ကောက်ယူခဲ့သော စာရင်းများအရ သိရသည်။

လက်ရှိတွင် ရခိုင်ပြည်နယ်ရှိ ကျောက်ဖြူခရိုင်၊ သံတွဲခရိုင်၊ မောင်တောခရိုင်၊ မြောက်ဦးခရိုင်နှင့် စစ်တွေ ခရိုင်ခရိုင် ငါးခုရှိသည့်အနက် ဘင်္ဂါလီ နှစ်သောင်းကျော်သာ ဘင်္ဂါလီအမည်ဖြင့် ထပ်တိုးကာလအတွင်း အကောက်ခံပြီးဖြစ်သည်။

အများစုသည် ကျောက်ဖြူနှင့် သံတွဲခရိုင်မှ ဘင်္ဂါလီများဖြစ်သည်ဟု သန်းခေါင်စာရင်း ဗဟိုကော်မရှင်ထံမှ သိရသည်။

ကချင်ပြည်နယ်တွင်လည်း ကေအိုင်အို (ကချင်လွတ်မြောက်ရေးအဖွဲ့) ထိန်းချုပ် နယ်မြေအတွင်း ရွာပေါင်း ၉၇ ရွာမှ လူဦး ရေ ၁,၀၀၀ ကျော် ကျန်ရှိနေသည်။ ကချင်ပြည်နယ်အတွင်း ကျန်ရှိနေသေးသည့် ကျေးရွာ များကို ကောက်ခံရန် ကေအိုင်အို နှင့် ဦးအောင်မင်းဦးဆောင်သည့် အစိုးရ အဖွဲ့တို့ မေလ ၁၃ ရက်တွင် တွေ့ဆုံစဉ် ထပ်မံတောင်းဆိုသွားရန် စီစဉ်ထားသည်ဟု ဦးခင်ရီက ဆိုသည်။

ယင်းမတိုင်မီအထိ အစိုးရဘက်မှ ကေအိုင်အိုသို့ ၎င်းတို့ထိန်းချုပ်နယ်မြေအတွင်း သန်းခေါင်စာရင်း ကောက်ယူရန် သုံးကြိမ်တိုင် တောင်းဆိုထားပြီးသော်လည်း မည့်သည့်အကြောင်းပြန်ချက်မှ မရရှိသေးဟု ၎င်းကဆိုသည်။

ကျန်ရှိနေသေးသည့် ဘင်္ဂါလီများနှင့် ကချင်လူဦးရေအချို့ကို ထပ်တိုးကာလအတွင်း ပါဝင်နိုင်ရေးအတွက် ကျန်ရှိသူများကို ဆက်လက်မကောက်ဘဲ ချန်ရှိထားခြင်း၊ အခြားရင်းမြစ်များကို အသုံးပြု ကောက်ခံခြင်း၊ ကျန်ရှိနေသူများနှင့် ကျယ်ကျယ်ပြန့်ပြန့် ဆွေးနွေးညှိနှိုင်းခြင်းနှင့် ကျန်ရှိသူအားလုံး၏ ၁၀ ရာခိုင်နှုန်းသို့ မဟုတ် ၂၀ ရာခိုင်နှုန်းသာ စစ်တမ်းအဖြစ် ကောက်ယူခြင်းစသည့် နည်းလမ်းလေးခုဖြင့် ဖြေရှင်းသွားရန် လျာထားသည်။ ထိုသို့ဖြေ ရှင်းရန် နိုင်ငံတကာ သန်းခေါင်စာရင်း အကြံပေးအဖွဲ့ ITAB နှင့် ပြည်တွင်း လူဦးရေပညာရှင်များ ပူးပေါင်းဆောင်ရွက်သွားမည် ဖြစ်သည်။

သန်းခေါင်စာရင်း ကောက်ယူပြီးစီးသည့် ရှေ့ပြေးစာရင်းများကို ၂၀၁၄ ခုနှစ် သြဂုတ်လတွင် ထုတ်ပြန်ပေး သွားမည်ဖြစ် ပြီး ယင်းစာရင်းတွင် ကျန်ရှိနေသည့် ဘင်္ဂါလီစာရင်းနှင့် ကချင်ဦးရေစာရင်းများ ပါဝင်မည် မဟုတ်ဘဲ နောက်ဆုံးစာရင်းများ ကိုမူ ၂၀၁၅ ခုနှစ် မေလတွင် ထုတ်ပြန်ပေးမည်ဟု ဦးခင်ရီက ပြောသည်။

Aye Chan Mon# Credit To :Mizzima - News in Burmese
မိတ်ဆွေဒီလင့် https://www.facebook.com/excellencemediaကလစ်လေးတချက်နှိပ်လိုက်ရုံဖြင့် သတင်းအစုံကို ဖတ်ရမှာပါ နိုပ်ဘို့မမေ့နဲ့နော်

1