မြန်မာနိုင်ငံ အပါအ၀င် ဖွံ့ဖြိုးဆဲနိုင်ငံများတွင် လာမည့်နှစ်နှစ်အတွင်း ကင်ဆာကြောင့် သေဆုံးနှုန်း နှစ်ဆတိုးမြင့် လာနိုင်ဟု ''ကင်ဆာရောဂါ ကင်းစင်ရေး အသိပညာဖြင့် ကာကွယ်ပေး'' ကျန်းမာရေး ဟောပြောပွဲတွင် ကင်ဆာအထူးကု ဆရာဝန်ကြီး ပါမောက္ခ ဒေါက်တာစိုးအောင်က ဆိုသည်။
လက်ရှိ မြန်မာနိုင်ငံတွင် ကင်ဆာဖြစ်ပွားသူ ဦးရေ နှစ်စဉ်မြင့်တက်လာပြီး ခန့်မှန်းခြေ လူဦးရေ တစ်သိန်းတွင် ကင်ဆာဖြစ်ပွားသူ ၁၅၀ ခန့် ရှိကြောင်းနှင့် မြန်မာနိုင်ငံ အပါအ၀င် ဖွံ့ဖြိုးဆဲနိုင်ငံများတွင် ကင်ဆာကြောင့် သေဆုံးသူဦးရေမှာ ကမ္ဘာ့ကျန်းမာရေး အဖွဲ့၏ ခန့်မှန်းတွက်ချက်မှု များအရ လူဦးရေ သုံးသန်းအထက်တွင် ရှိနေကြောင်း၊ ကင်ဆာဖြစ်ပွားရခြင်း အကြောင်းအရင်း များအနက် အစားအသောက်ကြောင့် ဖြစ်ပွားနှုန်းမှာ ၃၅ ရာခိုင်နှုန်းဖြင့် အမြင့်ဆုံးနေရာတွင် ရှိနေပြီး ဆေးလိပ်နှင့် ဆေးရွက်ကြီး သုံးစွဲမှုကြောင့် ၃၀ ရာခိုင်နှုန်း၊ ဗိုင်းရပ်စ်ပိုးများကြောင့် ၁၀ ရာခိုင်နှုန်းနှင့် လိင်ဆက်ဆံမှုများကြောင့် ၇ ရာခိုင်နှုန်း အသီးသီး ရှိနေသည်။
ထို့ပြင် ကမ္ဘာ့ကျန်းမာရေး အဖွဲ့၏ ခန့်မှန်းတွက်ချက်မှု များအရ လာမည့်နှစ်များတွင် တစ်ကမ္ဘာလုံး၌ လူလေးဦးတွင် တစ်ဦးနှုန်း ကင်ဆာဖြစ်ပွား လာနိုင်သည်ဟု ထုတ်ပြန်ထားကြောင်းနှင့် လူတစ်ဦးချင်း အနေဖြင့် ကင်ဆာဖြစ်ပွား နိုင်ခြေမှာ ပုံမှန်အားဖြင့် ၂၅ ရာခိုင်နှုန်းခန့်သာ ရှိနေသော်လည်း ပြောင်းလဲလာသည့် လူနေမှုပုံစံများကြောင့် ကင်ဆာဖြစ်နှုန်းများမှာ နိုင်ငံတိုင်းတွင် တဖြည်းဖြည်း မြင့်တက်လာခြင်း ဖြစ်ကြောင်း သိရသည်။
မြန်မာနိုင်ငံတွင် ကင်ဆာဝေဒနာရှင်များကို ကုသပေးနေသည့် ကင်ဆာဌာနကြီး သုံးခုဖြစ်သည့် ရန်ကုန်ပြည်သူ့ ဆေးရုံကြီး၊ မန္တလေးပြည်သူ့ ဆေးရုံကြီးနှင့် တောင်ကြီး စပ်စံထွန်း ဆေးရုံကြီးများတွင် တစ်နှစ်လျှင် ပျမ်းမျှလူနာသစ် ခုနှစ်ထောင်ကျော် ရှိနေပြီး ကုသမှုအပိုင်းနှင့် လူနာဦးရေမှာ ကွာဟချက်များစွာ ရှိနေကြောင်း သိရသည်။
ကင်ဆာဖြစ်နှုန်း အများဆုံး နိုင်ငံများအနက် မြန်မာနိုင်ငံသည် ဒုတိယနေရာ၌ ရပ်တည်နေခြင်း ဟုတ်မဟုတ်ကိုမူ သေချာသည့် စာရင်းဇယားများ မရှိခြင်းကြောင့် တရားဝင် ပြောကြားရန် အခက်အခဲများ ရှိနေကြောင်းလည်း ပါမောက္ခ ဒေါက်တာစိုးအောင်က ပြောကြားသည်။
၂၀၁၂ ခုနှစ်က ထွက်ရှိခဲ့သော အာရှ-ပစိဖိတ်ဂျာနယ်၏ “Cancer Preview” ကဏ္ဍတွင် အာဆီယံအဖွဲ့ဝင် နိုင်ငံများ၌ ကင်ဆာရောဂါ ၀န်ထုပ်ဝန်ပိုး ဖြစ်နေမှုကို စနစ်တကျ သုတေသန ပြုခဲ့သည့် သိပ္ပံစာတမ်း တစ်စောင်တွင် ဖော်ပြချက်များအရ မြန်မာအမျိုးသားနှင့် အမျိုးသမီးများတွင် ကင်ဆာကြောင့် သေဆုံးမှုနှုန်းမှာ အရှေ့တောင်အာရှတွင် တတိယနှင့် ပဉ္စမနေရာ၌ ရှိနေသည်။
(ဦးလှထွန်း မေတ္တာရိပ်မွန်(ကင်ဆာ) ဖောင်ဒေးရှင်းတွင် တက်ရောက် ကုသနေသည့် ဝေဒနာရှင်များအား တွေ့ရစဉ် (ဓာတ်ပုံ-အိသဉ္ဇာကျော်))
အေးချမ်းမွန် Credit To > Eleven Media Group
Post a Comment
EmoticonClick to see the code!
To insert emoticon you must added at least one space before the code.