- Created on Saturday, 02 November 2013 18:06
- Written by ရွှေဒါးမောင်လေးရည်
ရန်ုကုန်မြို့တွင် အောက်တိုဘာ ၃၀ ရက်ညက လျှပ်စစ်မီး ပြတ်တောက်သွား၍ ဖယောင်းတိုင်မီး ထွန်းညှိထားသည်ကို တွေ့ရစဉ်။ (ဓာတ်ပုံ-ဝေလင်းအောင်)
"လျှပ်စစ်ဓာတ်အားခ နှုန်းထားများ ပြင်ဆင်ပြောင်းလဲ ကောက်ခံမည့် ကိစ္စအား အသိပေး ကြေညာခြင်း" ဟူသည့် ခေါင်းစဉ်ဖြင့် လျှပ်စစ်ဓာတ်အား ဖြန့်ဖြူးရေး လုပ်ငန်း၏ ကြေညာချက်ကို အစိုးရထုတ် သတင်းစာ၌ အောက်တိုဘာ ၃၀ ရက်စွဲဖြင့် ဖတ်ရှုသိရှိ လိုက်ရပါသည်။
ဆက်၍ လျှပ်စစ်ဓာတ်အား ဖြန့်ဖြူးရေး လုပ်ငန်းသည် ဓာတ်အားထုတ်လုပ်မှု ကုန်ကျစရိတ်နှင့် ဓာတ်အားဝယ်ယူမှု ကုန်ကျစရိတ်များ တတ်နိုင်သမျှ ကာမိစေရန်အတွက် ၂၀၁၃ ခုနှစ် နိုဝင်ဘာလ ဓာတ်အားသုံးစွဲမှု အပေါ်မှ စတင်၍ တစ်ပြည်လုံး အတိုင်းအတာအထိ အောက်ပါနှုန်းထားအတိုင်း ပြင်ဆင်သတ်မှတ် လိုက်ပါသည်။
အများပြည်သူသုံးအတွက် ၁ ယူနစ်မှ ယူနစ် ၁၀၀ အထိ ၃၅ ကျပ်။ ၁၀၁ ယူနစ်မှ အထက် ကျပ် ၅၀။ စီးပွားရေး လုပ်ငန်းရှင်များအတွက် ၁ ယူနစ်မှ ယူနစ် ၅၀၀၀ အထိ ကျပ် ၁၀၀။ ၅၀၀၁ ယူနစ်မှ အထက် ကျပ် ၁၅၀ နှုန်းဖြစ်ပြီး အစိုးရ ဌာနများအတွက် ရုံးသုံးကျပ် ၅၀ နှင့် စက်မှုသုံး ကျပ် ၁၀၀ ဟု ဖော်ပြထားပါသည်။
ဤကဲ့သို့ ရုတ်တရက်နိုင်လှစွာ ဓာတ်အားခများ တိုးမြှင့်ကောက်ခံ လိုက်ခြင်းဖြင့် သုံးစွဲသူ အများပြည်သူတို့အတွက် "မြွေပူရာ ကင်းမှောင့်" သကဲ့သို့ ကုန်ဈေးနှုန်း ကြီးမြင့်မှု ဒဏ်ရာဒဏ်ချက်များဖြင့် အလူးလူး အလိမ့်လိမ့် ဖြစ်နေရချိန်၌ တစ်ပူပေါ် နှစ်ပူဆင့်လိုက်ခြင်းသာ ဖြစ်ပါသည်။
နောက်တစ်ချက်ကတော့ လျှပ်စစ်ဓာတ်အား ဖြန့်ဖြူးခွင့် ရလိုက်သည့် ပုဂ္ဂလိက ကုမ္ပဏီများ၏ အကျိုးစီးပွားများ တိုးတက်ဖြစ်ထွန်းရေးအတွက် လောလောလတ်လတ် အကျိုးပြုလိုက်ခြင်းလည်း မည်ပါသည်။ ယခင် အစောပိုင်း တစ်လနှစ်လခန့်ကပင် လျှပ်စစ်ဓာတ်အားခများ တိုးမြှင့်ကောက်ခံရေးအတွက် ကြိုတင်၍ ဟောကိန်းထုတ်ခဲ့သည်။ လျှပ်စစ်ဓာတ်အား ကျွမ်းကျင်သူတို့၏ စကားကို ပြန်လည်ကြားယောင် မိပါသည်။ အစိုးရက ဥပဒေစံနှုန်း မရှိသေးဘဲ လက်ရှိ လျှပ်စစ်မီတာခထက် သုံး၊ လေးဆအထိ မြင့်တက်နိုင်သည့် နှုန်းဖြင့် လျှပ်စစ်ထုတ်လုပ် ဖြန့်ဖြူးခွင့်အား ပုဂ္ဂလိက ကုမ္ပဏီများသို့ ဆက်လက်ခွင့်ပြုရန် စီစဉ်လျက်ရှိကြောင်း ကြားသိခဲ့ရပေရာ "ပြည်သူတို့ မျှော်လင့်ချက် လွှတ်တော်က ဖော်ဆောင်ရွက်" ဟု ဆိုခဲ့သော်လည်း ပြည်သူတို့၏ အကျိုးစီးပွားကို ထည့်သွင်းစဉ်းစားမှု မပြုဘဲ ပုဂ္ဂလိက ကုမ္ပဏီတို့၏ အကျိုးအတွက်သာ အလေးထား၍ ယခုကဲ့သို့ ဈေးနှုန်းများ ရုတ်တရက် တိုးမြှင့်လိုက်ခြင်းက စောစောကပြောခဲ့သည့် အများပြည်သူတို့၏ မျှော်လင့်ချက်ကို လွှတ်တော်ကြီးက အလေးထား အကောင်အထည် ဖော်လိုက်ခြင်းပေပဲ လားဟူ၍ေ၀၀ါးနေမိပါသည်။ ဒီကိစ္စနှင့် ပတ်သက်၍ ပြည်သူတို့ ၀န်းကျင်တစ်လွှား အသံဗလံများလည်း ပလူပျံလျက် ရှိပေသည်။ တကယ်တော့ မည်သို့ဆိုစေ ပုဂ္ဂလိက စီးပွားရေး လုပ်ငန်းရှင် အလတ်စား၊ အသေးစားများအတွက် ဈေးနှုန်းတက်သည် ပြောစေဦးတော့ တကယ်တမ်း အကျိုးအမြတ်များများ တစ်လုံးတစ်ခဲတည်း ခံစားရသူမှာ ကြီးကြီးမားမား လုပ်ငန်းရှင်ကြီးများ အတွက်သာ ဖြစ်ပါသည်။ ၎င်းတို့မှာ လျှပ်စစ်ဓာတ်အား ဖြန့်ဖြူးခွင့် ရရှိသည့် အေးရှားဝေါလ် ကုမ္ပဏီနှင့် ဧဒင်စွမ်းအင် သဘာဝ အရင်းအမြစ်များ ဖွံ့ဖြိုးတိုးတက်ရေး ကုမ္ပဏီ အပါအ၀င် ကုမ္ပဏီ ၂၀ တို့အား လျှပ်စစ်ဓာတ်အား ဖြန့်ဖြူးခွင့်ကို ခွင့်ပြုမိန့် ပေးထားခဲ့ပြီးဖြစ်သည်။
| စီးပွားရေးကလည်း အခက်အခဲတွေနဲ့ အကျပ်အတည်းတွေ ဖြစ်နေတဲ့ အချိန်မှာ ရုတ်တရက် မီတာခတွေ တိုးမြှင့်လိုက်တော့ ငွေကုန်ကြေးကျ ပိုများလာတာပေါ့။ အိမ်မှာက သားသမီးတွေရဲ့ ၀န်ထမ်းလစာတွေကလည်း မလောက်ငဘူး။ သွားရလာရတဲ့ ခရီးစရိတ်နဲ့တင် လစာက ထက်ဝက်ကျိုးနေတာ အခုတော့ မီတာခကပါ တက်မယ်ဆိုတော့ ပိုပြီးဒုက္ခရောက်ဖို့ပဲ ရှိတော့တာပေါ့ . . . . . |
ကုမ္ပဏီများနှင့် အကျိုးတူ ပူးပေါင်းလုပ်ဆောင်မှု ဆိုသော်လည်း ပြည်သူတို့ဘက် ငဲ့ကွက်စဉ်းစားမှု မပြုဘဲ ကုမ္ပဏီတို့၏ ထုတ်လုပ်မှုစရိတ် ကာမိစေရေးအတွက် တွက်ချက်တောင်းခံလာသည့် နှုန်းထားများအတိုင်း သဘောတူညီမှုပြုကာ ပြည်သူတို့အပေါ် စရိတ်စကများ တိုးမြှင့်ကောက်ခံ နေခြင်းမျိုးမှာ ပြည်သူတို့အပေါ် မငဲ့ကွက် မစာမနာရာ ရောက်ပေသည်။
နိုင်ငံတော် အနေဖြင့် လျှပ်စစ်ကဏ္ဍအတွက် အသုံးစရိတ်များစွာ ရင်းနှီး၍ လုပ်ကိုင်ဆောင်ရွက်လျက် ရှိသော်လည်း ယခုအချိန်ထိ လျှပ်စစ်ဓာတ်အား လိုအပ်မှုများမှာ ၇၅ ရာခိုင်နှုန်း အထိပင် ရှိသေးကြောင်းကိုလည်း သိရပေသည်။ လျှပ်စစ်ဓာတ်အားခ တိုးမြှင့်ကောက်ခံမည့် အနေအထားပေါ် ပြည်သူတို့၏ အသံများကိုလည်း ကြားသိရပေရာ "စီးပွားရေးကလည်း အခက်အခဲတွေနဲ့ အကျပ်အတည်းတွေ ဖြစ်နေတဲ့ အချိန်မှာ ရုတ်တရက် မီတာခတွေ တိုးမြှင့်လိုက်တော့ ငွေကုန်ကြေးကျ ပိုများလာတာပေါ့။ အိမ်မှာက သားသမီးတွေရဲ့ ၀န်ထမ်းလစာတွေကလည်း မလောက်ငဘူး။ သွားရလာရတဲ့ ခရီးစရိတ်နဲ့တင် လစာက ထက်ဝက်ကျိုးနေတာ အခုတော့ မီတာခကပါ တက်မယ်ဆိုတော့ ပိုပြီးဒုက္ခရောက်ဖို့ပဲ ရှိတော့တာပေါ့။ ကုန်ကျမယ့် စရိတ်တွေကသာ ပိုများလာတယ်။ ပိုပြီးလျော့သွားတယ် ဆိုတာမျိုးတော့ မရှိပါဘူး" လို့ တစ်ဦးက ဆိုပါသည်။
နောက်တစ်ဦးကတော့ "လျှပ်စစ်မီး အချိန်မှန်ရမယ်လို့ အာမခံနိုင်တဲ့အချိန် သင့်တင့်တဲ့ဈေးကိုတိုးတာ အကြောင်းမဟုတ်ဘူး။ စီးပွားရေး လုပ်ငန်းတွေကလည်း ကောင်းလားမေးရင် အရင်အတိုင်းပဲ။ အများပြည်သူရဲ့ နေ့စဉ်ဝင်ငွေကလည်း တိုးလာတာ မဟုတ်ဘူး။ ဓာတ်အားခ တိုးမယ်ဆိုရင်လည်း ပြင်ဆင်ချိန်ရအောင် အချိန်လုံလောက်စွာနဲ့ အသိပေးသင့်တယ်။ အများပြည်သူက မဲပေးရွေးချယ်ထားတဲ့ အစိုးရဖြစ်တယ်လို့ ဆိုတဲ့အတွက် အများပြည်သူကို သေချာချပြပြီးမှ လုပ်သင့်တယ်လို့ ထင်တယ်" လို့ ရင်ဖွင့်ခဲ့ပါသည်။
ဒီကနေ့ အချိန်၌ ကုန်ဈေးနှုန်းများကလည်း ဘက်ပေါင်းစုံက တက်နေသည့် အချိန်ဖြစ်သည်။ ထို့အတူ အလုပ်အကိုင် အခွင့်အလမ်းများကလည်း ခက်ခဲလျက် အလုပ်လက်မဲ့ နှုန်းကလည်း ရာခိုင်နှုန်း ၆၀ အထိ မြင့်တက်နေချိန်ဖြစ်သည်။ အစစ အရာရာတွင် အခက်အခဲမျိုးစုံ အိမ်ငှားခဈေးနှုန်း များကလည်း မိုးထက်သို့ တိုးတက်နေချိန် ဒီလိုအချိန်မျိုးနှင့် တိုက်တိုက်ဆိုင်ဆိုင် လျှပ်စစ်ဓာတ်အားခများကို တိုးမြှင့်လိုက်ခြင်းက အချိန်ကိုက် ဖောက်ခွဲလိုက်လေ သလားဟု ထင်မှားဖွယ် ဖြစ်၍နေပါသည်။
ဒီကိစ္စနှင့် ပတ်သက်၍ Eleven Media Group ၏ CEO ဒေါက်တာသန်းထွဋ်အောင်ကတော့ ဒီလိုပြောပါသည်။ "ဒီလို ဖွဲ့စည်းပုံ အခြေခံဥပဒေ ပြင်ဆင်ရေး ပြည်တွင်းငြိမ်းချမ်းရေးတွေကို ပြည်သူတွေ အာရုံစိုက်နေတဲ့ အချိန်မှာ ဒါဟာနောက်ထပ် ဖောက်ခွဲလိုက်တဲ့ ဗုံးတစ်လုံးပေါ့ဗျာ။ ကုန်ဈေးနှုန်းတွေ တက်နေတယ်။ ပြည်တွင်း ပဋိပက္ခ ပြဿနာတွေကြောင့် လူတွေစီးပွားရေး မကောင်းဘူး။ နိုင်ငံခြား ရင်းနှီးမြှုပ်နှံမှုတွေ ထင်သလောက် မ၀င်လာဘူး။ ပြည်သူတွေ ပိုကျပ်တည်း လာနေတယ်။ ဒီအခြေအနေမျိုးမှာ လျှပ်စစ်ခကို ဒီလိုနှစ်ဆ တိုးလိုက်တယ်ဆိုတာ အတော်ကြီး မညှာမတာ လုပ်ရာကျပါတယ်။ ဒီ Impact အရမ်းကြီးတယ်။ ၂၀၀၇ ခုနှစ်က စက်သုံးဆီ ဈေးတက်သလို ဖြစ်လာလိမ့်မယ်"
နိုင်ငံတော် အကြီးအကဲများက ဆိုခဲ့ပါသည်။ နိုင်ငံတော် အစိုးရက ၁၆ ရာခိုင်နှုန်းအထိ ဆင်းရဲမွဲတေမှု ကိန်းဂဏန်းများကို လျှော့ချသွားရန် ဆက်လက်ဆောင်ရွက် နေပါသည်ဟု ဆိုပါသည်။ အပြောနှင့် လက်တွေ့လုပ်ဆောင်ချက်များ ထပ်တူညီဖို့ လိုပါသည်။ သို့မှသာ အလုပ်ဖြင့် သက်သေပြရာ ရောက်နိုင်မည် ဖြစ်ပါသည်။ ပြည်သူ့လွှတ်တော် ဥက္ကဋ္ဌကြီးကလည်း ပြောခဲ့ဖူးပါသည်။
ကျွန်တော်တို့ ပြဋ္ဌာန်းလိုက်တဲ့ ဥပဒေတွေဟာ "နိုင်ငံတော်နှင့် နိုင်ငံသား အကျိုးစီးပွားကို ကာကွယ်စောင့်ရှောက်သည့် ဥပဒေဖြစ်ရေး" ဟု ဆိုထားခဲ့ပေရာ လျှပ်စစ်ဓာတ်အားခ နှစ်ဆတိုးမြှင့် ကောက်ခံမည်ဆိုသည့် ကိစ္စကတော့ ကျွန်တော်တို့ကဲ့သို့ အများပြည်သူ၏ အကျိုးစီးပွားကို ကာကွယ်စောင့်ရှောက်ရာ မရောက်ဘဲ လက်တစ်ဆုပ်စာ ကုမ္ပဏီကြီးများ၏ အကျိုးစီးပွား အတွက်သာလျှင် ကြည့်ရာ ရောက်မနေပေဘူးလားဟူ၍ မေးခွန်းထုတ်လာ ခဲ့သော်...။
အေးချမ်းမွန် Credit To > Eleven Media Group
https://www.facebook.com/
Post a Comment